УИХ-ын Төсвийн, Хуульзүй, Эдийн засгийн байнгын хороо тус тус хуралдахаар өчигдрийн хуваарь гарсан байсан ч хойшилсон. Өмнөх өдөр нь УИХ-ын чуулган шөнийн 01 цаг хүртэл хуралдаж, Шийдлийн Засгийн газрын сайд нарыг томилох асуудлыг хэлэлцсэн юм. Томилгоо дууссаны дараа нэгэндээ баяр хүргэж, амжилт хүссээр бараг 02 цаг хүргэсэн байна. Тиймээс өглөө эртлэн хуралдах тов зарласан дээрх гурван Байнгын хорооны ирц бүрдээгүй учир хойшлуулав. Уг нь Зөвшөөрлийн тухай, Чөлөөт бүсийн тухай, Улсын тэмдэгтийн хураамжийн тухай хуулийн төсөлд нэмэлт оруулах тухай хуулийн төсөл, Барьцаалан зээлдэх журмаар зээл олгох үйл ажиллагааны тухай болон холбогдох бусад хуулийн төслүүдийг хэлэлцэхээр товлоод байсан юм. Гишүүд шөнө дүл болтол хуралдсандаа ядарсан уу эсвэл ялархав уу парламентын нэг өдрийн ажил ямартай ч цалгардлаа.
Томилгоо, халаа сэлгээ, огцруулах асуудал хэлэлцэх болоход УИХ-ын чуулган, Байнгын хорооны ирц бүрэн байдаг атал жирийн үедээ ажилдаа ирээгүй эрхэм гишүүдэд УИХ-ын дарга хариуцлага тооцох байх гэж найдъя.