ЦЕГ-аас өнөөдөр /2024.02.26/ мэдээлэл хийлээ.
Цагдаагийн Ерөнхий Газрын Кибер гэмт хэрэгтэй тэмцэх газрын дарга, дэд хурандаа С.Тайван, ЦЕГ-ын кибер гэмт хэрэгтэй тэмцэх хэлтсийг өргөжүүлэх Кибер гэмт хэрэгтэй тэмцэх газар болгосон. Газрын бүрэлдэхүүнд иргэдэд учирсан хохирлыг шуурхай нөхөн төлүүлэх зорилгоор Кибер гэмт хэрэгтэй тэмцэх төв буюу шуурхай ажиллагааны хэлтсийг байгуулсан. Цахим залилан хийсэн этгээдүүд иргэдийн мөнгийг авахаас өмнө таслан зогсоох зорилгоор энэ хэлтсийг байгуулаад ажиллаж буй юм.
Сүүлийн үеийн судалгаагаар кибер орчинд үйлдэгдэж байгаа гэмт хэргийн 98 орчим хувийг бусдын нэр дээр нээсэн арилжааны банкны данс, виртуал хөрөнгийн хэтэвч, бусдын нэр дээр авсан үүрэн холбооны утасны дугаар, олон нийтийн цахим сүлжээнд хуурамч хаяг үүсгэн цахим залилан хийж байна.
Хэлтэс байгуулагдсан цагаас хойш нийт 2.9 тэрбум төгрөгийн хохирол учирсан 943 дуудлага мэдээллийг хүлээн авч, 300 дуудлага мэдээлэлд нь нийт мөнгөн дүнгийн 60.1 хувьд буюу 1.7 тэрбум төгрөгийн банкны дансанд хязгаарлалт хийсэн. Дуудлага мэдээллийн төрлөөр нь авч үзвэл:
- Цахим залилангийн 561 дуудлага хүлээн авснаас 243 дуудлага мэдээлэлд учирсан хохирлын дансыг тухайн мөчид царцаасан.
- Цахим халдлагын 289 дуудлага мэдээлэл хүлээн авснаас 39 дуудлага мэдээлэлд нь хууль бусаар олж авсан мөнгөний шилжилт хөдөлгөөнийг хязгаарласан.
- Андуурсан гүйлгээ 49 байснаас 14 дансанд хязгаарлалт хийсэн.
- Цахим мөрийтэй тоглоомын 31 дуудлага ирснээс найман дансанд хязгаарлалт хийсэн.
- Худал мэдээлэл тараах 13 дуудлага мэдээлэл, нийт 943 дуудлага мэдээлэл дээр ажилласан.
- 26 иргэнд учирсан 161 сая төгрөгийг иргэнд нь буцаан өгсөн.
Иргэд цахим орчинд байршуулсан хуурамч зард итгэж их хэмжээний мөнгө шилжүүлж хохирч байна. Тухайлбал, байр, машин худалдах зар, сүүлийн үед өвс худалдана гэсэн зард итгэж мөнгө шилжүүлэн хохирч байна. Хэрэв та цахим залиланд өртсөнөө мэдсэн даруйдаа Цагдаагийн байгууллагын 102 дугаарын утсаар холбогдож, мэдэгдээрэй. Кибер гэмт хэрэгтэй тэмцэх төвийн ажилтан 24 цагаар жижүүрлэж, банкны ажилтантай 24 цагийн турш холбогдон ажиллаж учирсан хохирлыг тэр даруйд нь банкинд царцаагаад, иргэнд нөхөн төлүүлэх чиглэлээр ажиллаж байна гэв.
