Попын гүнж Бритни Спирс АНУ-ын телевизийн “X Factor” шоуны шүүгчээр ажиллахаар болжээ. Уг шоуны продюсер Саймон Коувел өмнөх улиралд хамтран ажиллаж байсан Паула Абдул, Николь Шерзингер нарыг халж, гэрээгээ цуцалснаар хоёр эмэгтэй шүүгчийн суудал эзгүйрээд байсан юм. Тэгвэл одоо нэг суудал нь поп гүнж Бритни Спирсийнх болох нь. Харин нөгөөх нь 19 настай дуучин, жүжигчин Деми Ловатод оногджээ. 16 насандаа “Baby one more time” хит дуугаараа дэлхий нийтийг байлдан дагуулж байсан Бритнигийн оргил үе нь 1990-ээд онд өнгөрсөн ч дэлхийн хамгийн алдартай оддын нэг хэвээр байгаа учир шоундаа хамтран ажиллахыг урьсан гэдгээ Саймон мэдэгджээ. Харин Деми Ловато бол “Sonny with Chance” телевизийн цуврал, “Skyscraper” зэрэг хит дуугаараа олны танил болж яваа залуу уран бүтээлч юм.
Шоуг дамжуулагч “Fox” телевиз Бритниг шүүгчийн суудалд суулгахын тулд хэдэн сая ам.доллар амласнаа нууцалж байгаа ч 15 сая ам.доллараас буугаагүй гэж хэвлэлүүд бичиж байна. Хэрэв энэ үнэн бол Бритни хөгжмийн одод дундаа хамгийн өндөр хөлсөөр гэрээ байгуулсан шүүгч болох юм.
