Элсэлтийн ерөнхий шалгалт эхлэхэд гуравхан хоног үлдлээ. ЭЕШ-ын дараа буюу ирэх сараас их дээд сургуулийн элсэлт эхэлнэ. Энэ жилийн хувьд их дээд сургуульд элсэгчдийн өрсөлдөөн 20-оос илүү хувиар буурна гэсэн судалгаа гарчээ. Түрүү жилүүдэд улсын хэмжээнд 43 мянга орчим хүүхэд ЭЕШ өгөхөөр бүртгүүлдэг байсан бол энэ жилийн урьдчилсан тоогоор 41 мянга орчим хүүхэд шалгуулна хэмээн үзэж байсан ч албан ёсоор 37 мянган хүүхэд бүртгүүлсэн дүн мэдээ гарсан.
Гэхдээ БШУЯ-наас АШУҮИС зэрэг зарим их, дээд сургуулийн элсэгчдийн хяналтын тоог 20 орчим хувиар бууруулан тогтоосон ч МУИС, МУБИС зэрэг бүтцийн шинэчлэл хийсэн, шинээр хөтөлбөр боловсруулж буй сургуулиудын бакалаврын түвшний элсэгчдийн хяналтын тоог 20 хувиар нэмэгдүүлсэн юм. Энэ дагуу зарим төрийн өмчийн их сургууль элсэгчдийнхээ тоог гаргажээ.
МУИС ирэх хичээлийн шинэ жилд бакалаврын хөтөлбөрүүддээ 4245 элсэгчийг Улаанбаатар хот болон хөдөө орон нутгаас авч суралцуулна. Энэ жил МУИС өнгөрсөн онд элсүүлсэн оюутны тооноос харьцангуй олон оюутан авахаар болж байна. Учир нь, МУИС-ийн хувьд инженерчлэлийн хөтөлбөрүүд шинээр нээсэн, бүтцийн өөрчлөлт хийж байгаа зэргээс үүдэн ийм боломж гарлаа. Харин ШУТИС өнгөрсөн жилүүдэд элсэлт авдаг тоондоо буюу 5800 гаруй оюутан элсүүлэхээр болжээ. Энэ жилээс нэрээ, бүтцээ шинэчилж байгаа АШУҮИС харин өмнөх жилүүдийнхээс элсэгчдийн тоогоо цөөлнө хэмээн мэдэгдсэн ч яг баттай шийд гаргаагүй байгаа.
Шинэ хичээлийн жилээс ерөнхий боловсролын сургуулиуд 12 жилийн сургалтад шилжиж буйтай холбогдон 2015-2016 оны хувьд ЕБС төгсөгчдийн тоо бараг 50 хувиар буурах тооцоо гарч байгаа. Тиймээс энэ эрсдлийг урьдчилан тооцож, эртнээс бэлтгэлтэй байх чиглэлээр анхааран их дээд сургуулийн элсэлтийг аль болох багасгах бодлого БШУЯ-наас барьж байгаа. Тэгэхээр энэ жил хүссэн их дээд сургуульдаа орж чадаагүй ч ирэх жил дахин ЭЕШ өгч хүссэн сургуульдаа орох боломжтой болох нь.
