Үйлдвэр, хөдөө аж ахуйн яамны Төрийн нарийн бичгийн дарга Х.Золжаргал өнөөдөр Засгийн газрын 11-11 төвд ажиллаж иргэдийн асуултад хариуллаа.
Энэ жил улсын хэмжээнд 286.6 мянган га талбайд үр тариа, 10.0 мянган га талбайд төмс, 5.5 мянган га талбайд хүнсний ногоо, 65.0 мянган га талбайд тосны ургамал тариалжээ. 16.1 сая мал төллөснөөс 16 сая төл бойжиж байна хэмээн Төрийн нарийн бичгийн дарга Х.Золжаргал онцолсон юм. Үйлдвэр, хөдөө аж ахуйн яамнаас уламжлалт мал аж ахуйн салбараас гадна мах, сүү, ноосны чиглэлийн үүлдэр угсааны малын эрчимжсэн аж ахуйг түлхүү дэмжих бодлого баримталж байгаа аж. Түүнчлэн газар тариалангийн салбарт ногоочдын үйл ажиллагааг механикжуулах, хүнсний ногооны зоорь барих зэрэг төслийг дэмжжээ. Хөнгөн үйлдвэрийн салбарт ноос, ноолуур, сүү, сүүн бүтээгдэхүүн, ферм, хүлэмжийн аж ахуйд зориулж 270 тэрбум төгрөг, арьс ширний үйлдвэрлэлд 140 тэрбум төгрөг баталсныг олгож эхлээд байна. Өнгөрсөн намар 14.546 мянган тонн мах нөөцөлснөөс 9200 тонныг борлуулжээ. Наадам хүртэл махны нөөц хангалттай гэдгийг тэрээр хэллээ.
Мөн малчдыг эдийн засгийн мэдлэгтэй болгоход анхаарч, түүхий эдээ хөдөө аж ахуйн биржээр дамжуулан борлуулдаг жишгийг бий болгосон. Малчдын бүх гүйлгээ тухайн хүний “Малчин данс”-аар дамжин хийх бөгөөд ингэснээр бүх төрлийн зээл, хөнгөлөлтөд хамрах боломжтой болох аж.
