Судалгааны “Reputation Institute”-ээс дэлхийн нэр хүндтэй компаниудын жагсаажээ. Энэ жагсаалт нь хэрэглэгчдийн зүгээс тухайн компанид үзүүлдэг итгэл, хүндлэлийн зэргийг харуулдаг. Судлаачид энэ оны эхээр дэлхийн хамгийн том, хүчирхэг 15 улсад явуулсан “Global RepTrak 100” судалгааны үр дүнд үндэслэн энэхүү жагсаалтыг гаргасан байна. Эхний аравт орсон компаниудыг уншигч танд сонирхуулж байна.
“Google” ба “The Walt Disney Company”
Жагсаалтын нэгдүгээр байрыг энэ хоёр компани эзэлжээ. “Google”–ийг шилдэг удирдлагатай, ажиллахад хамгийн таатай орчинтой компани гэж үзсэн. Харин “Walt Disney Company” -г нийгмийн асуудлыг шийдэхэд онцгой анхаарч, энэ чиглэлээр ихээхэн үр дүнтэй ажилладаг гэж нэгдүгээрт оруулжээ. Ийнхүү энэ хоёр компани хоёул шилдэг нь болсон тул жагсаалтыг гаргагчид хоёрдугаар байрыг тодруулаагүй.
“BMW Group” ба “Rolex”
Гуравдугаар байранд мөн л хоёр компани орсон байна. Ингэхдээ “BMW” компанийг компанийн удирдлагаараа дэлхийд тэргүүлдэг гэж үнэлж. Харин “Rolex” компанийг бүтээгдэхүүний чанар ба борлогдсоны дараах засвар үйлчилгээгээр тэргүүлдэг гэж үзжээ. Нэг байранд хоёр компани жагссанаас үүдэн дөрөвдүгээр байранд орох компанийг дээрхтэй адил шалгаруулаагүй байна.
“Sony”
Японы “Sony” компани нь өнгөрсөн жилийнхээс нэг шат ахин дэлхийн хэмжээнд хамгийн нэр хүндтэй компаниудын айргийн тавд оров. Дэлхийн хэмжээнд тавдугаарт ч гэлээ Европын хэмжээнд “Sony” компани хамгийн шилдэг нь болсон гэдгийг хэлэх хэрэгтэй.
”Canon”
Өнгөрсөн жил наймдугаар байранд орсон ”Canon” компани энэ жил шууд хоёр шат ахин зургадугаар байранд оров.
“Apple”
Тим Кукийн удирдаж байгаа компани өнгөрсөн жил дөнгөж 12 дугаар байранд байсан бол энэ жил ийнхүү шууд таван байр ахилаа. “iPhone” ба “iPad”-ын үйлдвэрлэгчийг оны шилдэг инновацитай компани гэж үнэлжээ.
” Daimler”
Наймдугаар байранд Германы машин үйлдвэрлэгч “Daimler” концерн орсон байна. Энэ компани нь машин үйлдвэрлэлээрээ дэлхийд тэргүүлэгчийн нэг бөгөөд ачааны машин үйлдвэрлэгч “Daimler Trucks”-ын хувьцааны 100 хувь, “Mitsubishi Fuso Truck and Bus”-ын 85 хувь, “European Aeronautic Defence and Space Company” –ийн 22,4 хувь,”Automotive Fuel Cell Cooperation” –ийн 50,01 хувь, “КАМАЗ”-ын 11 хувь гэх мэт машин ба нисэх онгоц, сансрын хөлөг үйлдвэрлэгч шилдэг компаниудын том хувьцаа эзэмшигч юм.
“LEGO”
Хүүхдийн тоглоом үйлдвэрлэгч энэ компани есдүгээр байранд оров.
“Samsung” ба “Microsoft”
Нэгэн үе дэлхийн хамгийн нэр хүндтэй компани явсан “Microsoft” энэ жил гурван шат буурч 10 дугаарт оров. Гэхдээ зүгээр ч нэг орсонгүй энэ байрыг “Samsung” компанитай хуваалцав. Өмнөд Солонгосын “Samsung” компани урьд нь хэрэглэгчдийн зүгээс хэзээ ч ийм өндөр хүндлэл, итгэл хүлээж байсангүй. 2011 онд 43 дугаар байранд явсан бол 2013 онд 16 дугаарт орж байсан юм.
