Реалити шоуны од Ким Кардашианы "Vogue" сэтгүүлийн шинэ дугаарын нүүрэнд гарсан зураг олны шүүмжлэлд дарагдаад удаагүй байтал дотор нүүрүүдийн зураг болон, зураг авах үеийн хөшигний цаанах дүрс бичлэгийг бас дэлгэжээ. Ким Кардашиан сүйт залуу, рэппер Кэни Уэстийн хамт хуримын даашинзтайгаар нэр хүндтэй "Vogue" сэтгүүлийн нүүрэнд гарсан нь түүний хувьд мөрөөдөл боловч тус сэтгүүлийн уншигчдын дийлэнх нь маш таагүй сэтгэгдэлтэйгээр хүлээн авсан юм. Тэр бүү хэл зарим нэртэй уншигчид нь сэтгүүлийг ийм зураг дахин нийтлэх юм бол захиалгаа цуцална гэж хүртэл мэдэгджээ.
Гэхдээ олны энэ шүүмжлэл, дургүйцлийг Ким Кардашиан огтхон ч тоохгүй байгаа бөгөөд "Сэтгэл хөдлөөд, амьсгал ч авч чадахгүй догдолж байна" хэмээн Твиттертээ бичжээ. Түүний сүйт залуу Кэни Уэст ч бас сэтгүүлийн зургаас Твиттертээ дэлгэж, "Мөрөөдөл биеллээ" хэмээн бичсэн байна.
Ким Кардашианыг "Vogue"-ын нүүрэнд гаргахын тулд Кэни Уэст мөнгө төлсөн гэдэг яриа гараад байгаа. Учир нь, тус сэтгүүлийн эрхлэгч Анна Винтур өмнө нь "Намайг үгүй болсны дараа л Ким Кардашианыг манай сэтгүүл дээр гаргаарай" хэмээн хэлж байсан удаатай юм. 
