Орост болж байгаа өвлийн олимпын дэвжээнд 15 настай орос охин од болон дэлхийг гайхуулж байхтай зэрэгцээд манайд  БШУЯ-ны Стратеги, бодлого төлөвлөлтийн газрын дарга Б.Насанбаяр гэдэг насанд хүрсэн, багагүй өндөр албаны нэг авгай  жинхэнэ од боллоо.
Монгол улсын боловсролын салбарын хэтийн бодлогыг барьж төлөвлөж байгаа энэ хүн МҮОНТ-ийн мэдээллийн “Цагийн хүрд” хөтөлбөрөөр “Цаг нэмэгдлээ гээд бүгдийг багш заадаг арга барилаар хүүхэд чадваржихгүй гэдэг нь бодит байдал дээр харагдаж байна. Ялангуяа уран зохиолын хичээлийн эхүүд бол бүх хичээлийн агуулгад ордог.  Тухайн зүйлийн мөн чанар, шинжлэх ухааны ойлголтыг судлахын тулд хүүхэд унших, бүтээлч сэтгэлгээтэй байх ёстой. Тиймээс үүнийг нэг хичээл болгон үзэх шаардлагагүй. Бүх хичээлийн агуулгад орсон, нэгдмэл байхыг илүүд үзсэн” гээд л нүд нь бүлтийхгүй, чих нь дэлдийхгүй ярьж сууна.
Өөрөө үүнийгээ засч залруулж, телевизийнхэн  яриаг нь танаж тайрснаас болоод үзэгчид буруу ойлгосон гээд байгаа ч нэгд: анхдагч мэдээлэл ямагт хүчтэй байдаг, хоёрт: бид энэ хүүхэн шиг өндөр албаны биш болов ч нэгэн цагт уран зохиолын хичээл үзэж байсан болохоороо яав чиг энэ сайхан хичээлийг хасах гэж байгаа юм байна гэж ойлгоод байна.
Тэгээд ч үүнийг жирийн нэгэн хэлээгүй боловсролын салбарын хэтийн бодлогыг төлөвлөж байгаа хүн хэлсэн болохоор  өнөө эс болохноо  хэзээ нэгэн цагт ийм гай дайрах нь гэдгийг ойлгоод байна.
Үүнээс гадна энэ хүний хэлсэн үгэн дотор “Цаг нэмэгдлээ гээд бүгдийг багш заадаг арга барилаар хүүхэд чадваржихгүй гэдэг нь бодит байдал дээр харагдаж байна” гэсэн өгүүлбэр байна. Багш илүүдэл болж байна гэж ойлгож болох нь. Бодвол уран зохиолын багш л байлгүй дээ.
Энэ мэргэн хүүхэн бас “Ялангуяа уран зохиолын хичээлийн эхүүд бол бүх хичээлийн агуулгад ордог” гэж айлджээ. “Эх” гэдэг бол эх сэдэв, уран зохиолын хичээлээр бол эх зохиол. Тэгэхээр энэ хүүхний хэлж байгаагаар бол химийн хичээл дотор “Гэсэр”, “Жангар” тууль ч  юм уу, Пушкиний “Дубровский” тууж л явдаг байх нь. Эсвэл математикийн хичээлийн сурах бичигт Монголын болоод дэлхийн сонгодог зохиолууд орчихсон байдаг юм байна.
Тэгээд л химийн багш химийн томъёотойгоо хамт энэ зохиолуудыг заачих юм байна. Ухаандаа усны томъёо заахдаа аугаа Ц.Дамдинсүрэнгийн “Зугаацахаар мордсон нь” гэдгийг заах юм уу даа.

Тооны хичээлийн багш бол 1+1 гэж заахдаа “Энд Хэнтийн нуруу байна, тэнд Хангайн нуруу байна. Энэ бол Д.Нацагдоржийн “Миний нутаг шүлэг” гээд уянгалуулан уншиж байгаад хонх дуугарахын өмнөхөн “тэнцүү 2” гээд л хичээлээ дуусгах жишээтэй. Харин биеийн тамирын хичээл дээр сагсан бөмбөгийн хичээл орж байхдаа хүүхдүүд ямар зохиолыг яаж үзэх, бөмбөг ороход ямар найраглал, роман гарч ирэхийг би төсөөлшгүй. Бодвол Насанбаяр хүүхэн мэдэж байгаа биз.
Хошин юм шиг атлаа энэ бүхэн Б.Насанбаяр хатагтайн үгнээс үүдэлтэй.

 Гэхдээ би үүнийг өнөөгийн Монголын төр засгийн "старатеги, бодлого төлөвлөлт" гэж бодохгүй байна.
Харин энэ төр засаг, ямар албан тушаалтан  хаанахын ямар гээч хүүхнээ хаанаас олж ирээд ямар албан тушаалд томилчихсон юм бол гэж гайхаж сууна.
Төрийг түшмэл нь төлөөлдөг, түшмэл нь нэг хазгай гишгихэд түмэн олон төрийг л буруу ташаа ойлгодог.
Б.Насанбаяр авгайн хадуурал үүгээр бас дуусаагүй. Дараа нь телевиз сайтуудаар тайлбар хийдээ "Миний үгийг буруу ойлгосон байна" хэмээн дахин давтан хэлээд байгаа нь монголын ард түмнийг тэнэг гэж хэлээд байгаа бололтой.
Ийм хүнийг чинь яах вэ, та минь ээ.
Үнэхээр шинэчлэлийн Засгийн газар юм бол, нээрээ л уран зохиолын хичээлийг сургалтын хөтөлбөрөөс хасах гээгүй юм бол БШУЯ энэ нэг хачин хүүхнээсээ салж үз Н.Алтанхуяг сайд аа, Л.Гантөмөр сайд аа.
Нэрэнд чинь сэвтэй, ажилд тань цөвтэй.
Хаанаас ч гараад ирсэн, хэн гэдэг, юу ч хийж байсан хүн юм. Шохой барьж самбарын өмнө зогсч ганц цагийн хичээл зааж үзсэн ч юм уу үгүй ч юм уу.

Уг нь шинэчлэгдэж байгаа, ухаалаг, ардчилсан төр улстай оронд бол нийт хүн ардын дургүй хүргэсэн ийм хариуцлагагүй юм ярьсан хүн байтугай, хувийн жижиг алдаа гаргасан сайд, албан тушаалтан өөрөө сайн дураараа огцордог юм билээ. Б.Насанбаяр авгайн ярьж байгаагаас харахад бол энэ хүн тэр Газрын даргынхаа суудлаас тас тэврээд хэвтчих байх л даа.
Уран зохиолынхоо багш нарыг бүгдийг ажилгүйчүүдийн эгнээ рүү шилжүүлж, хойч ирээдүйгээ өнөөгийнхнөөс ч дор тультраа хэлтэнгүүд болгох  гээгүй л бол Б.Насанбаяр авгайг ажлаас нь халсан нь дээр дээ.
Аль нь дээр юм бол Ерөнхий сайд аа.......