ССАЖЯ “Хүүхдэд зориулсан уран сайхны болон хүүхэлдэйн киноны зохиол шалгаруулах” уралдааныг өнгөрсөн долдугаар сард олон нийтийн дунд нээлттэй зарласан. Эл уралдаанд олон ангит хүүхэлдэйн киноны зохиолын төрлөөр 15, бүрэн хэмжээний хүүхдийн уран сайхны кино зохиолын төрлөөр 26 бүтээл ирсэн байна. Ингээд салбарын сайдын тушаалаар томилогдсон мэргэжлийн зөвлөл хуралдаад хүүхэлдэйн кино зохиолын төрлийн тэргүүн байрыг Хө.Хүчитхарын “Бага хөлгөн туульс” зохиолд, дэд байрыг Б.Анармаагийн “Нарны бэлэг” зохиолд өгсөн байна. Харин хүүхдийн бүрэн хэмжээний уран сайхны киноны зохиолын төрөлд Ч.Наранцэцэгийн “Өөр” нэртэй зохиол тэргүүн байр, С.Ангарагийн “Итгэл” зохиол дэд байрыг тус тус эзэлсэн байна. Уралдааны болзлын дагуу шагналт байранд шалгарсан бүтээл тус бүр 3-5 сая төгрөг хүртэж буй.
