Улаанбаатар хотын хэмжээнд авто тээврийн хэрэгслийн албан татвар, агаарын бохирдлын төлбөрийг замын санд төвлөрүүлэх ажил өнөөдөр дуусна. Өнгөрсөн гуравдугаар сарын 1-нээс эхэлсэн татвар хураалтаар нийслэлийн замын санд 11.9 тэрбум төгрөг төвлөрчээ. Энэ мөнгийг авто зам арчлах, шинэчлэх, засварлахад зарцуулдаг журамтай. Тэгвэл энэ жил нийслэлийн Засаг даргын захирамжаар замын сангийн хөрөнгөөр орон сууцны хороолол дундах авто замыг засахаар болсон байна. Өөрөөр хэлбэл, нийслэлийн зургаан дүүргийн 11 хэсэгт орон сууцны хороолол дундах авто замыг засна. Орон сууцны хороолол дундах замыг засч шинэчлэх компани, аж ахуйн нэгжийг нийслэлийн Худалдан авах ажиллагааны газар холбогдох хууль тогтоомжид нийцүүлэн сонгон шалгаруулах юм байна.
