Монгол Улсын Ерөнхийлөгч Ц.Элбэгдорж XYII жарны “Тийн ялгуусан” хэмээх усан могой жилийн сар шинийн босгон дээр зарлиг гаргаж улс, бүсийн баяр наадмаас уясан морь нь айраг түрүү хүртсэн уяачдад улсын цол хүртээлээ. Тухайлбал, Төв аймгийн Сэргэлэнэ сумын харьяат Улсын манлай уяач Агваансамдангийн Батсүх, Говь-Алтай аймгийн Шарга сумын уугуул, улсын манлай уяач Хадбаасангийн Бат-Эрдэнэ нарт Тод манлай уяач цол хүртээв.
Харин Улсын манлай уяач цолны болзлыг Өвөрхангай аймгийн Өлзийт сумын уугуул, нийслэлийн алдарт уяач Цэрэндэжидийн Цэнд-Аюуш, Өвөрхангай аймгийн Хайрхандулаан сумын уугуул улсын алдарт уяач Бат-Өлзийн Отгоннасан нар хангаж цол тэмдэгээ төрийн тэргүүнээсээ гардан авлаа.

Мөн олон жил улс бүсийн наадамд хурдан хүргүүдээ сойж, айраг, түрүү хүртсэн Булган аймгийн Гурванбулаг сумын уугуул, аймгийн алдарт уяач Пүрэвийн Мэндбаяр, Булган аймгийн Хутаг-Өндөр сумын уугуул, аймгийн алдарт уяач Дэмбэрэлийн Дэлгэрбаяр, Говь-Алтай аймгийн Халиун сумын уугуул, аймгийн алдарт уяач Туваанжавын Гантөмөр нар улсын алдарт уяач хэмээх нэр хүндтэй цолны эзэн болж, улсын цолтнуудын гэрт багтлаа. Уяачдад цол хүртээсний дараа  Монгол Улсын Ерөнхийлөгч Ц.Элбэгдорж, “Эрдэнэт хүлгээ уяж, олон түмнээ баясган уралдуулж сар шинийн өмнө хийморьтой сайхан цол хүртэж байгаад та бүхэнд баяр хүргэе. Монгол хүний хувьд морио уяж уралдуулах нь монголчуудын гайхамшигтай ёс уламжлал юм. Мөн жилийн дөрвөн улирлын нөр их хөдөлмөр шаардсан, асар их ухаан шаардсан ийм гайхамшигтай ажил юм. Малчин хүн мянган мэргэжлийн эзэн гэдэг. Уяач хүн бол нэмэх нь дахиад зөндөө олон нарийн мэргэжил эзэмшдэг байх. Намайг хөдөө орон нутагт явж байхад олон хүн хурдан удмын морь өгч, уяж баярлуулдаг. Тэр олон морь маань хурдалж байгаа байх гэж бодож байгаа. Морь уяна гэсэн бодол ч надад байгаа шүү. Монголчууд бүгдээрээ морио уядаг, уяачдынхаа алдар, хөдөлмөрийг үнэлж хүндэтгэдэг, дэмждэг байх ёстой. Та бүхэнтэй цуг морь уяж нэг галд уралдуулдаг, нэг хамт олон болж яваа хүмүүст, гэр бүлийнхэн, ойр дотнынхон, унаач хүүхдүүдэд, бусад уяачдад цагаан сарын шинийн нэгний мэнд дэвшүүлж, сайн сайхныг хүсэн ерөөе” гэв.

Улсын тод манлай уяач цолныг энгэртээ зүүсэн уяач Х.Бат-Эрдэнэтээс цөөн асуултад хариу авлаа.

-Тод манлай уяач цолны эзэн боллоо. Энэ жил хэрхэн наадав. Хэчнээн түрүү айраг, хүртээд байна вэ?
-Энэ жил одтой сайхан наадлаа. Төрийнхөө их баяр наадамд хурдан хүрэн морио түрүүлгэсэн. Энэ жилийн тухайд хоёр түрүү, есөн аман хүзүү авсан. Энэ амжилтыг минь үнэлж Улсын тод манлай уяач цол олгож байгаад баяртай байна.
-Таны хурдан хүлгүүдийн удам, угшил нь хаанахынх вэ?
-Хэнтий, Сүхбаатар чиглэлийн хурдан буян байгаа. Мөн Дорноговь, Дундговь чиглэлийн хурдан хүлгүүдийг уралдуулж байна.

Улсын алдарт уяач П.Мэндбаяртай уулзаж баярын сэтгэгдлийг нь хуваалцлаа.

-Улсын алдарт уяач цол хүртсэн танд баяр хүргэе?
-Баярлалаа.
-Энэ цолонд хүрэхэд олон сайхан хурдан хүлгээ улс, бүсийн наадамд хурдлуулсан байх. Амжилтаасаа хуваалцахгүй юу?
-Сайхан өдөр байна. Энэ цолыг авсандаа маш их баярлалаа. Олон жил морь уяж, тоосонд нь дарууллаа. Мориныхоо түүх соёлыг шүтэж явдаг даа. Улс, бүсийн наадамд миний унаган адуу айраг, түрүү хүртсэн. Одоогийн байдлаар таван түрүү, 10 гаруй айраг хүртээд байна.
-Хурдан хүлгүүдийн чинь угшилыг сонирхож болох уу. Аль зүгийн адуу цуглуулж байна вэ?
-Унаган адуунууд сайхан давхиж байна. Найз нөхөддөө өгсөн миний унаган хүлгүүд ч сайхан хурдалж байгаа.
-Хэдэн жилийн өмнө санагдаж байна. Бор даага түрүүлж байсан. Дараа нь соёолондоо бас сайхан хурдалсан шүү дээ?
-Тийм ээ. Ланд машины бооцоот уралдаанд түрүүлсэн хүлэг бий. Мөн хурдан хар морь, хонгор халзан морь минь намайг энэ амжилтад хүргэсэн дээ. Адуу гэдэг аргагүй сайхан амьтан юм даа.