Пёнчан-2018 өвлийн олимпийн наадам болох БНСУ-ын Ганвон мужийн захиргаанаас МҮОХ-нд ирүүлсэн урилгын дагуу “DREAM” хөтөлбөрт хамрагдахаар манай өсвөрийн гурван тэшүүрчин, дасгалжуулагч Б.Болдбаатар (Төв аймгийн Эрдэнэ сумын сургууль)-ын хамт Гуулин орныг зорив. Ирээдүйн цагаан олимпод оролцох хүсэл эрмэлзэл өвөртөлсөн 13-14 насны Б.Зоригтбаатар, Г.Маралмаа (хоёул Сонгинохайрхан дүүргийн IX сургууль), Я.Зоригтбаатар (Төв аймгийн Эрдэнэ сумын сургууль) нар 14 хоногийн турш дэлхийн 50 гаруй орны үе тэнгийн тамирчидтай олон улсын өндөр зэрэглэлийн мэргэжилтнүүдийн удирдлагаар хамтарсан бэлтгэл хийнэ. БНСУ-ын Ганвон мужийн Пёнчан хотод таван жилийн дараа өвлийн XXIII олимпийн наадам зохиогдох бөгөөд энэхүү наадамд оролцох нөөц бололцоо бүхий өсөх ирээдүйтэй өсвөр тамирчдад бодит туслалцаа үзүүлэх, ур чадварыг нь дээшлүүлэх зорилгоор тэдний бүх зардлыг хариуцан, Солонгосын ҮОХ, Олон улсын тэшүүрийн холбоо (ISU)-той хамтран жил бүр “DREAM” хөтөлбөрийг хэрэгжүүлэх юм. Залуу тамирчдыг үдэн гаргах ёслол Улсын аварга шалгаруулах тэмцээний үеэр Төв цэнгэлдэх хүрээлэнд болж МҮОХ-ны ерөнхий нарийн бичгийн дарга Ж.Отгонцагаан, Монголын тэшүүрийн холбооны ерөнхийлөгч, МҮОХ-ны Гүйцэтгэх зөвлөлийн гишүүн Ц.Даваасүрэн нар оролцов.
