“Олон улсын ахмадын баяр”-ын өдрийг тохиолдуулан Төрийн нарийн бичгийн дарга С.Цогтгэрэл, Төрийн захиргааны удирдлагын газрын дарга Б.Баярмаа нар Байгаль орчин, аялал жуулчлалын яамнаас гавьяаны амралтдаа гарсан ахмадуудаа хүлээн авч уулзан, хүндэтгэл үзүүллээ.

Уулзалтын үеэр Байгаль, орчин аялал жуулчлалын салбарын бодлого, зорилт, хэрэгжүүлж буй ажлын талаар танилцуулж, санал хуваалцав.

Ахмад зүтгэлтнүүдийнхээ туршлага, мэдлэгийг салбарын цаашдын бодлого, хууль тогтоомжид тусгах хүрээнд БОАЖ-ын сайд, Төрийн нарийн бичгийн даргын тушаалаар салбар, чиглэлийн ажлын хэсгийн бүрэлдэхүүнд ахмадууд орж, ажиллаж байгаа. Тухайлбал Ойн дагалт баялаг ашиглах журмыг шинэчлэх, Байгалийн нөөц ашигласны төлбөрийн тухай хуулийг шинэчлэн боловсруулах, Уур амьсгалын өөрчлөлтийн чиглэлээр хууль эрхзүйн баримт боловсруулах зэрэг томоохон төсөл хөтөлбөрүүдийг дурдаж болох юм. Мөн цаашид “Ахмадын зөвлөх үйлчилгээг бий болгох”-оор зорьж байгааг онцоллоо.

Байгаль орчныг хамгаалах, нөхөн сэргээх, байгалийн нөөц баялгийг зохистой ашиглах чиглэлээр хууль, эрх зүйн орчныг боловсронгуй болгох, ногоон хөгжил, аялал жуулчлалын бодлогыг тодорхойлох, хөгжүүлэхэд үнэтэй хувь нэмрээ оруулан ажилласан нийт ахмад зүтгэлтнүүддээ талархал илэрхийлье.

ҮЕИЙН ҮЕД, ҮРИЙН ҮРД ҮНЭТЭЙ ЗӨВЛӨМЖ, СУРГАМЖАА ХАЙРЛАН ЭРҮҮЛ ЭНХ, УРТ НАСЛАХЫГ ХҮСЭН ЕРӨӨЕ.