Монгол Улсын Ерөнхийлөгчийн Тамгын газраас "Хавдар судлалын үндэсний төв II"-ыг барих асуудлаар мэдээлэл өглөө. Энэ үеэр Ажлын хэсгийн гишүүн, Эрүүл мэндийн сайд С.Мөнхсайхан “Манай улсад хавдрын нөхцөл маш хүнд байна. Эрүүл мэндийн яамны зүгээс хавдраас бид хэрхэн урьдчилан сэргийлэх вэ, хэрхэн яаж эрт илрүүлэх вэ, илрүүлсэн өвчлөлийг хэрхэн чирэгдэл багатай эмчлэх тал дээр бодлого барьж байна. Олон улсын түвшинд хүрсэн, шинжлэх ухаан, нотолгоонд суурилсан эмчилгээ, шинжлэх ухаанч үйлчилгээ үзүүлэхэд "Хавдар судлалын үндэсний төв II"-ын зорилго оршиж байгаа юм. Иймд "Хавдар судлалын үндэсний төв II"-ыг барьж байгуулах зайлшгүй шаардлага үүсээд байна. Үүнд 4-5 жилийн хугацаа шаардах байх. Энэ хугацаанд Хавдар судлалын үндэсний төвөө бид өргөтгөж, тусламж үйлчигээгээ сайжруулах зайлшгүй шаардлагатай. Тиймээс 2025 оны төсөвт өнөөдрийн ХСҮТ-ийг өргөтгөж, шинэчлэх төсвийг суулгасан” гэлээ.
