ТЕГ-аас хойшлуулшгүй ажиллагаа явуулж иргэн Ч.Мөнхбаярыг саатуулсан. Улмаар Үндэсний аюулгүй байдлын эсрэг гэмт хэрэг хийсэн хэмээн мэдээлсэн билээ. Өнөөдөр Ч.Мөнхбаярын өмгөөлөгч Г.Баасан, А.Батдорж нар мэдээлэл хийлээ.
Өмгөөлөгч Г.Баасан “Ч.Мөнхбаярыг яллах нь зохиомол хэрэг. Нууц гэдэг юм гэмт хэрэг дээр байж болохгүй. Нууц гэдэг үгийн дор Ч.Мөнхбаярыг хилс хэрэгт гүтгэж байна. ҮАБЗ анхааралдаа авах ёстой. Таслан шийтгэх арга хэмжээг өөрчлөхгүй байсаар энэ хүний бие нь муудаж, эмнэлэгт хэвтлээ. Ичсэн хүн хүн ална гэдэг юм болж байна. Хавтаст хэрэгтэй хорьхон минутын өмнө танилцсан шүүгч орж ирж байна. Процессийн алдаа гаргасандаа эд нар хариуцлага хүлээх ёстой. Ичсэндээ алах вий дээ, эд нар. Энэ хавтаст хэрэг дотор нууц гэсэн үг нэг ч байхгүй, тийм учраас нууцаас гаргаж ҮХЦ, УИХ-ын төлөөлөл, ХҮЭК хэлэлцүүлэх ёстой. Яагаад энэ хүнийг БНХАУ-ын хуулиар яллах гээд байгаа юм, яагаад жил гаруй мөрдсөнөө тайлбар өгөх ёстой. ҮХЦ хуулийг манаж л байгаа бол анхааралдаа авах ёстой. Тэгэхээр өнөөдөр Ч.Мөнхбаярын асуудлыг ҮАБЗ анхаарахаас өөр аргагүй болсон. Бид нар ХЭҮК-т хандсан. Одоо СНЭ-д хандана. Манай сэтгүүлчид яагаад нэгнээ хамгаалахгүй байгаа юм. Олон улсын сэтгүүлчдийн байгууллагад бид хандах гэж байна. ҮАБЗ-д хүсэлт өгсөн. Хариуг нь удахгүй өгөх байх. Хүнийг зүйл ангигүйгээр хорьж байна. ҮАБ-ын эсрэг найман жилтэй зүйл анги гэдэг ч энэ нь тогтоогдохгүй байгаа учраас зүйл ангигүй гэж байна. Тагнуул, прокурор өөрсдийнхөө хийсэн хууль бус үйл ажиллагааны гацааг гаргах гэж л ийм байдалд орчхоод байна. “ гэх агуулгатай мэдээлэл өгч байна.
