Урд хөрш Хятадад  хөлтэй нь хөлхөж, хөлгүй нь мөлхдөг Цагаан сарын хөдөлгөөний оргил үе ид үргэлжилж байна. Энэ сарын 28-нд тахиа жилтэй золгох Хятадын ард түмний Цагаан сарын баярын хөдөлгөөний урсгал энэ сарын 13-наас нэмэгдэж эхэлсэн бөгөөд ирэх сарын 21-нээс л татарна гэсэн тооцоо байна. Энэ нэг сар гаруйн хугацаанд Хятадын эх газарт хүн төрөлхтний түүхэнд байгаагүй их хөл хөдөлгөөн өрнөх нь дараах тоон баримтуудаас тодорхой харагдана.
2,98 тэрбум аялал- Цагаан сарын зорчих хөдөлгөөн энэ жил 2,2 хувиар нэмэгдэж, хятадууд нийтдээ 2,98 тэрбум удаа зорчино гэсэн тооцоог Засгийн газар гаргажээ.

356 сая - Зөвхөн галт тэргээр зорчихоор тасалбар авсан хүмүүсийг тооцоход ийм байна.

58 сая –Онгоцоор нисэхээр тасалбар авсан зорчигчдын тоо

42 сая-Далайгаар зорчигчдын тоо

1000 ширхэг-Хамгийн эрэлттэй тээврийн хэрэгсэл болох галт тэрэгний тасалбар оргил ачааллын үед нэг секундэд 1000 ширхгээр зарагдаж байжээ.

400 цагдаа-Зөвхөн Бээжингийн баруун төмөр замын буудалд цагдаагийн 400 алба хаагч, төмөр замын 200 хамгаалагч, сайн дурын 640 ажилтан зорчигчдын хөдөлгөөнийг зохицуулж байна.

500 мянга-Бээжин, Шанхай, Гуанжоу зэрэг томоохон хотын галт тэрэгний буудалд нэг дор хагас сая хүн ачаа тээшээ хүлээн хэдэн цагаар “түгжигдэх” явдал гарч байна.

410 км-Цагаан сарын өмнө, хойно ирж буцах замыг нь тооцвол нэг хүн дунджаар 410 километрийг туулахаар байна.

1,2 тэрбум км-Хэрэв дээрх тоог нийт аялагчдаар үржүүлвэл 1,2 тэрбум км болж байгаа нь дэлхийгээс нар хүртэл найман дахин аялахаар хол зайг хятадууд Цагаан сарын үеэр туулдаг гэсэн үг юм.

6 сая-Энэ бол Цагаан сарын урт амралтыг ашиглан хилийн чанадад аялахаар төлөвлөсөн хятадуудын тоо.

6800 юань-Тэд энэ аяллынхаа үеэр дунджаар 6800 юань буюу 985 ам.доллар зарцуулахаар тооцоо гарчээ.

174 чиглэл-Цагаан сарын үеэр хятадууд эх газраас гадагш 174 чиглэлд аялах төлөвлөгөөтэй байна.

20 хувь-Цагаан сарын үеэр Хятадын авиа компаниуд жилийнхээ нийт орлогын 20 хувийг олдог, оргил ачааллын үе юм.

100 тэрбум доллар-Энэ бол хятадуудын Цагаан сарын үеэр баярын хоол хүнс, бэлэг сэлт, амралт зугаалгад зарцуулдаг нийт мөнгөн дүн.