1950-1953 оны Солонгосын дайны дараа хуваагдсан гэр бүлүүдийг уулзуулахад Өмнөд Солонгос болон БНАСАУ бэлэн болжээ. Энэ тухай Олон улсын Улаан Загалмай Нийгэмлэгийн төлөөлөгч мэдээлжээ.
“Төрөл төрөгсөдтэйгөө уулзахаар 10 дугаар сарын 20-нд Умард Солонгосыг зорих 394 хүн Сокчо хотод цуглараад байна” гэж тэрбээр хэлсэн байна. Түүний хэлснээр, уулзалтыг хоёр үе шаттайгаар зохион байгуулах бөгөөд хуваагдсан гэр бүлүүдийн гишүүд өдөрт хоёр хоёр цагаар нийтдээ зургаан цаг орчим уулзах боломжтой.
Төрөл төрөгсөд, ойр дотны хүмүүсээ 50 гаруй жил хараагүй гэр бүлүүдийг 2000 онд болсон Солонгос хоорондын дээд хэмжээний уулзалтын дараа хэд хэдэн удаа уулзуулсан юм. Хамгийн сүүлд 2014 оны эхээр ийм уулзалт зохион байгуулжээ. Солонгосын Өмнөд болон Умард хэсэгт оршин суугчид харилцан бие биенийдээ зочлох, захидал бичилцэх, утсаар ярих эсвэл интернэтээр харилцах боломжгүй юм. Өмнөд Солонгосын 68 мянга гаруй иргэний төрөл төрөгсөд Умардад оршин суудаг бөгөөд тэдний дийлэнх нь 1953 оноос хойш 38 дугаар өргөргөөс хойш хэсэгт оршин сууж байгаа төрөл садантайгаа уулзаагүй байна.
Энэ жилийн уулзалтад оролцогсдыг сугалаа сугалуулах замаар санамсаргүй байдлаар сонгожээ.
