Шударга өрсөлдөөн хэрэглэгчийн төлөөх газар, Нийслэлийн мэргэжлийн хяналтын газартай хамтран импортын зарим нэр төрлийн хүнсний бүтээгдэхүүнд зар сурталчилгаа, сав, баглаа боодол, шошгожилт зэрэгт хяналт шалгалт хийжээ.
Шалгалтаар хэд хэдэн аж ахуй нэгжийн өргөн хэрэглээний бараа бүтээгдэхүүнд зөрчил илэрчээ. Тодруулбал, Цайны ертөнц ХХК-ийн “Найман тахилтай цай”, Стимо ХХК-ийн “Гүрж ногоон цай”, Таван богд интернэйшнл ХХК-ийн “Найман гишүүн төгөлдөр”, “Мөнгөн аягат” зэрэг ижил төрлийн бүтээгдэхүүний шошгод үйлдвэрлэсэн улс, орныг тэмдэглээгүй, үйлдвэрлэгчийн нэр хаяг бичигдээгүй буюу тодорхой бус, Миний сүлжээ дэлгүүрийн худалдаалж буй “Бөмбөөлэй” цагаан будаа, Бамаш ХХК, Тэмүүлэн Маш ХХК-ийн худалдаалж буй цагаан будааны шошгод үйлдвэрлэсэн улс орныг тэмдэглээгүй, үйлдвэрлэгчийн хаяг бичигдээгүй буюу тодорхой бус гэсэн зөрчлүүд илэрсэн байна.
Эдгээр нь савласан бүтээгдэхүүний шошгожилтод тавигдах ерөнхий шаардлагыг хангаагүй, хэрэглэгчдийг төөрөлдүүлж байгаа болохыг улсын байцаагчийн дүгнэлтээр тогтоож, зөрчлийг арилгуулахаар албан шаардлага хүргүүлсэн байна.
