Монгол Улсын Төрийн албаны тухай хууль, Монгол Улсын Ерөнхийлөгчийн зарлигаар баталсан “Төрийн захиргааны албан хаагчийн тангараг өргөх ёслолын журам”-д заасны дагуу шинэ албан хаагчид төр, ард түмнийхээ төлөө үнэнч шударга ажиллахаа тангараглалаа. Шалгалтад тэнцэж тухайн албандаа ажиллах шаардлага хангасан албан хаагчид тангараг өргөснөөр төрийн жинхэнэ албан хаагч болдог. Энэ удаад аймгийн хэмжээнд 25 иргэн төрийн албан хаагчийн тангараг өргөх болзол хангаж үүнээс 17 иргэн Нутгийн удирдлагын ордонд тангараг өргөж, батламжаа гардан авлаа. Тангараг өргөх ёслолыг Өмнөговь аймгийн Төрийн албаны салбар зөвлөл зохион байгуулж зөвлөлийн дарга Б.Түвшинбаяр, аймгийн Засаг даргын орлогч Д.Нацагдорж болон бусад албаны хүмүүс оролцож шинээр тангараг өргөсөн төрийн жинхэнэ албан хаагчдад баяр хүргэж ажлын амжилт хүслээ.
Төрийн албан хаагчид 1995 оноос тангараг өргөж эхэлсэн бөгөөд Монгол Улсын иргэн төрийн захиргааны албанд анх орохдоо "Эх орон, ард түмнийхээ төлөө эрдэм чадлаа зориулж, төрийн хууль, ёс зүйн хэм хэмжээг чанд сахиж, албан үүргээ үнэнч шударгаар биелүүлэхээ тангараглая. Тангарагаа няцвал хуулийн хариуцлага хүлээнэ" хэмээн тангарагладаг юм.
