Монголын нийслэл Улаанбаатарт бадам лянхуа суудлаар суусан хэлбэртэй занданшуулсан шарил олсон тухай хэвлэл мэдээллийн хэрэгслүүд  бичиж эхэллээ. Энэ шарил лавтай 200 жилийн настай хэмээн урьдчилсан байдлаар үзэж байна. Шарилыг ёстой тохиолдлоор олсон гэснээс биш хэрхэн олсон тухай тодорхой мэдээлээгүй байна. Занданшуулсан шарилыг үхрийн ширэнд боож хадгалж байсныг цагдаагийнхан илрүүлж Шүүхийн шинжилгээний үндэсний төвд өгсөн гэнэ.
Ямар хүнийг ингэж хүндэтгэлтэйгээр занданшуулсан нь  одоогоор тогтоогоогүй байгаа юм байна.
        
                            Монголд олоод байгаа занданшуулсан шарил

Зарим эх суралж энэ бол бурхны шашны хувилгаан хүн гэж бичиж байгаа юм. Өөр бас зарим нь 2002 онд ил гаргаж ирсэн буриадын Итгэлт хамба Дашдоржийн багш нь гэсэн таамаглал ч гаргаж байна.
Итгэлт хамбын ач охин Янжим Дабаевна Васильева “1917 оны хувьсгалын дараа тэрээр Оросын буддын шашны тэргүүний албанаас чөлөөлөгдөөд 10 жил даяанчилж гэгээрэл хийсэн. 1927 оны зургадугаар сарын 15-нд өөрийнхөө шавь нарыг цуглуулаад “Хойдохын буяны ерөөл” уншихыг хүссэн гэдэг. Энэ бол талийгаачийн хойноос уншдаг ном л доо. Шавь нар нь “Яагаад энэ номыг унших гэж. Та чинь амьд сэрүүн байна шүү дээ” гэхэд тэрээр өөрөө энэ номыг уншаад амьсгал хураасан гэнэ.

                        Буриадын Итгэлт хамба Дашдоржийн шарил                

Итгэлт хамбыг бадам лянхуа цэцгийн суудлаар суулгаж занданшуулаад хайрцганд хийн оршуулсан байна. Насан хутаг олохын өмнө Итгалт хамба “30 жилийн дараа ирж миний биеийг хараарай. Харин 75 жилийн дараа би эргэж ирнэ” гэж гэрээсэлсэн гэдэг.
Бурхны шашинтнууд түүний хэлсэн ёсоор 1957 онд түүний шарилыг гаргаж үзээд хөндөж барьсангүй дахин оршуулжээ.
2002 он есдүгээр сард бурхны шашинтнууд шарилыг нь бүрмөсөн гаргаж ирсэн юм. Үнэхээр тэр яг 75 жилийн дараа эргэж ирсэн нь энэ хэмээн topnews.ru сайтад бичжээ.