Хятадын өмнөд нутгийн нэгэн тосгоны оршин суугчид гар, хөлийн үеийг аймшигтайгаар эрэмдэглэн өөрчилдөг учир битүүлэг өвчинд нэрвэгдээд олон жил болж байгаа аж. Эмч нар өвчний шалтгаан эмчлэх аргыг олох гэж олон жил судалгаа явуулж байгаа ч тодорхой үр дүнд хүрээгүй гэнэ.
Өвчний улмаас тосгоны оршин суугчдын хөл гар нь хачин байдлаар мушгирч тахийсжэн мэт харагддаг, цөөнгүй тохиолдолд арьсан дээр нь маш хөндүүр цэврүү үүсдэг.
Тосгоны иргэдэд тусламж болгон явуулсан эмч нар өвчний гарал үүслийг тайлбарлах гээд мухардалд орж. Аргагүйн эрхэнд Кашин-Бекийн өвчин гэж нэрлэгддэг тун ховор эмгэг мөн байх гэсэн таамаг дэвшүүлээд байгаа аж. Энэ өвчнийг Ууруудын өвчин гэдэг бөгөөд гол төлөв Хятад, Сибир, Хойд Солонгост бүртгэгддэг. Өвчин үүсэх шалтгаан нь хоол хүнс, усанд селен нэртэй элемент шаардлагатай түвшинд хүрэхээргүй бага эсвэл огт байхгүй байх явдал.
Хэдийгээр энэ элемент нь их хэмжээгээр хүнд хортой байдаг ч бага тунгаар бол хүнд зайлшгүй хэрэгтэй бөгөөд бие эрүүл байхын нэг нөхцөл. Туслахаар ирсэн эмч нар тус тосгонд 20 хүн өвдсөн байгаагаас дийлэнх нь эрэгтэйчүүд байгааг тогтоосон.
Цөөнгүй тохиолдолд өвчний харагдах нь байдал нь аймшигтай төдийгүй хүний ажлын чадварыг алдагдуулдаг нөлөөтэй. Харин хөдөө тосгоны хүмүүсийн хувьд биеийн хүчний ажил хийж чадахгүй байна гэдэг амьдрах эх үүсвэргүй болж байгаатай адил.
Жишээлэхэд, өвчинд нэрвэгдсэн 38 настай эмэгтэй 12 жилийн турш гэр зуур хамгийн хөнгөн ажил хийхээс өөр чадваргүй яваа. Түүний хэлж байгаагаар тосгоны олон хүн тусламж хүсч эмнэлэгт үзүүлж байсан ч тэдэнд юу тохиолдсон, юугаар өвдөснийг тодорхойлсон тохиолдол нэг ч гарч байгаагүй гэнэ.
Тосгонд ирсэн эмч нарын баг нууцлаг өвчнийг Кашин-Бекийн өвчин мөн гэдгийг нотлохын тулд ундны ус, хоолон дахь селений хэмжээг тодорхойлж байгаа аж.Гэвч энэ өвчин мөн гэдэг нь батлагдлаа ч өвдсөн хүмүүсийн зовлон дуусахгүй. Учир нь Кашин-Бекийн өвчнийг эмчлэх ямар ч аргагүй. Мэс засал хийлгэх, физик эмчилгээнд явах зэргээр өвчний явцыг хүндрүүлэлгүй, өвдөлтийг хурцдуулалгүй байлгах л боломжтой.
Үүний дээр гол төлөв хүүхдэд илэрдэг энэ өвчин яагаад насанд хүрсэн хүмүүсийг дайрах болсныг тогтоох шаардлагатай болно.
