Монгол Солонгосын эдийн засгийн форум Улаанбаатар хотноо өчигдөр эхэллээ. Гурван өдөр үргэлжлэх чуулга уулзалт нь хоёр улс хоорондын эдийн засгийн харилцааг эрчимжүүлэх, чөлөөт худалдааны гэрээ байгуулах санаачилга гаргах, технологи нэвтрүүлэх, боловсон хүчнээ сургах, өмнө нь БНСУ-д ажиллаж амьдарч байсан боловсон хүчнээ дахин сургаж чадавхижуулах, үнэмлэх олгох зорилготой юм.
Форумыг нээж УИХ-ын гишүүн, "Монгол-Солонгосын эдийн засгийн форум" ТББ-ыг үүсгэн байгуулагч, Удирдах зөвлөлийн дарга Г.Батхүү "2015 онд Монгол Улс, БНСУ-ын хооронд дипломат харилцаа тогтоосны 25 жилийн ой тохиох гэж байна. Бид Монгол, Солонгосын эдийн засгийн харилцан ашигтай хамтын ажиллагааны бодлогыг боловсруулж тодорхойлох, бизнес эрхлэгчдийг туршлага солилцуулах, холбох, хөрөнгө оруулалтыг татах зорилгоор энэхүү форумыг үүсгэн байгуулсан билээ. 2014 онд УИХ-ын даргын болон Монгол Улсын Гадаад харилцааны сайдын БНСУ-д хийсэн албан ёсны айлчлалын хүрээнд хоёр томоохон арга хэмжээ зохион байгуулж, БНСУ-д зорчих визний нөхцөлийг хөнгөлүүлэх асуудлаар ярилцсаны үндсэн дээр виз олгоход гарч байсан хүндрэл ариллаа. Мөн хоёр орны эдийн засаг, хамтын ажиллагааны хөгжилд ихээхэн хувь нэмэр оруулахуйц гэрээ хэлцлүүд байгууллаа. Монгол дахь анхны уулзалтаа Монгол Улс, БНСУ-ын улстөрчид, эрдэмтэн судлаачид, бизнесийн тэргүүлэх байгууллагуудын төлөөллийн идэвхтэй оролцоо дэмжлэгтэйгээр хамтран зохион байгуулж байна.
Тус форумаар дамжуулан хоёр орны бизнес, эдийн засгийн харилцааг өргөжүүлэх, чөлөөт худалдааны гэрээ байгуулах нөхцөлийг бүрдүүлэх санал санаачилгыг өөрийн улсын төр засгийн холбогдох түвшинд гаргах ажлыг эрчимжүүлэх асуудлаар хоёр тал анхаарч Монгол Улсад нэвтрүүлэх, түүнтэй уялдуулан мэргэжилтэй боловсон хүчнийг бэлтгэх, БНСУ-д одоо ажиллаж байгаа болон байсан иргэдээ бүртгэлжүүлэх, албан ёсны зохион байгуулалтанд оруулах, мэргэжлийн ур чадвар, хэлний мэдлэгийг сертификатжуулах, тэдний олж авсан ур чадвар, мэдлэгийг улс орны хөгжил дэвшил, бүтээн байгуулалтад ашиглах зэрэг ажлыг хийх нь зүйтэй юм" гэлээ.
Эргэн сануулахад, БНСУ-д анх 2006 онд Солонгос-Монголын эдийн засаг, бизнесийн форум байгуулагдсан боловч зарим шалтгаанаар үйл ажиллагаа нь зогсонги байдалд оржээ. Харин 2014 оны нэгдүгээр сарын 8-ны өдөр Улаанбаатар хотноо "Монгол-Солонгосын эдийн засгийн форум" ТББ үүсэн байгуулагдаж, хоёрдугаар сарын 12-14-нд БНСУ-д Гадаад харилцааны сайд, "Монгол- Солонгосын эдийн засгийн форум"-ын Удирдах зөвлөлийн гишүүн Л.Болд айлчлах үеэр Монгол, Солонгосын хамтарсан форум зохион байгуулсан юм. Энэ үеэр мөн "Монгол- Солонгосын эдийн засгийн форум" болон БНСУ-ын "Солонгос-Монголын хамтын ажиллагааны форум"-ын хооронд түншлэлийн Харилцан ойлголцлын санамж бичигт гарын үсэг зурсан билээ.
Мөн 2014 оны гуравдугаар сарын 12-14-нд УИХ-ын дарга З.Энхболдын айлчлалын үеэр хамтарсан форум зохион байгуулж, "Эрдэнэс Тавантолгой" ХК, Монголын авто тээвэрчдийн нэгдсэн холбоо, БНСУ-ын "Дэлим" корпорац хамтран ажиллах санамж бичиг үзэглэсэн юм. Түүнчлэн 2014 оны тавдугаар сарын 9-12-нд Улаанбаатар хотноо "Солонгос-Монголын шилдэг бүтээгдэхүүний үзэсгэлэн" зохион байгуулж, хоёр талаас 100 гаруй компани оролцжээ.
Энэ удаагийн Монгол-Солонгосын эдийн засгийн форум албан ёсны зургаа дахь арга хэмжээ аж. Форумын үеэр төлөөлөгчдийг "Эрдэнэс Тавантолгой" ХК, "Оюутолгой" ХХК болон Монгол дахь БНСУ-ын компаниудын үйл ажиллагаатай танилцуулах аялал зохион байгуулж буй юм. Цаашид хамтарсан форумыг жилд хоёр удаа Монгол Улс болон БНСУ-д тус тус зохион байгуулах, бизнес, эдийн засгийн мэдээлэл солилцох, талуудын харилцан ашигтай хамтын ажиллагааг өрнүүлэх, хоёр улсын бизнесийн байгууллагуудыг бүтээн байгуулалтад хамтран ажиллахад туслалцаа үзүүлэх, Нийгэм соёл, бизнес эдийн засаг, боловсролын дэд хороодыг байгуулах зэрэг зорилт тавилаа.
