Дорнодын С.Билэгсайхан өөрийн амьдрал, ардчиллын үйл хэрэгт оролцож явсан түүхээ “Шинэтгэл, Шинэ Монгол” хэмээх ном болгон гаргажээ. Аян замын уртад сэтгүүлчтэй ярилцсанаа байгаа чигээр нь ном болгосон нь эвтэйхэн хэлбэртэй болсон байна. ЗХУ-д дээд сургууль төгсч ирээд барилгын инженерээр ажиллаж байсан залуу яагаад 1989 оноос эхтэй ардчилсан хувьсгалын үйл хэрэгт оролцох болов гэдгээс эхлээд МоАХ-ны дарга, улмаар МоАН-ын нарийн бичгийн дарга болсон, огцорсон түүх сэлтийг амьдрал, тэмцэл дэх зовлон жаргалын хамт илэн далангүй өгүүлжээ.
“Ёлтоохой”, “Улзын эгшиглэн”, “Инженер ба нэг л юм болохгүй байсан он жилүүд”, “Үүлэн чөлөөний нар”, “Зориг бид хоёр”, “Ардчилсан хувьсгал ба хойно сурч байсан оюутан”, “Эби бид хоёр”, “Трактортой ухуулагч”, “Сэтгэлийн дуудлагаар нэгдэгсэд”, “Улс төрийн түүхэн чухал алхам” гэх зэрэг гарчгаас нь харахад улстөрчийн хөрөг ном гэхээр юм.
