Нефть импортлогч компаниудад 120 сая ам.долларын хөнгөлөлттэй зээл олгосноор шатахууны үнийн өсөлт, хомсдол нам дарагдсан гэж найдтал үгүй юм аа. Зөвхөн нийслэлийн хэмжээнд хянаж чадсан бололтой. Говь-Алтай аймаг руу томилолтоор явах замдаа Өвөрхангай аймгаар дайрч шатахуунаа цэнэглэв. “Петровис” , “МТ” шатахуун түгээх станц АИ-92 олгохгүй гэсэн тул аймгийн төвийг хэсэг тойрч давхисны эцэст “Шунхлай”-гаас арай л гэж шатахуун авах нь тэр. “Петровис” ШТС-ын түгээгчээс юунаас болоод шатахуун олгохгүй байгааг тодруулахад нөөц нь дууссан гэсэн хариулт өглөө. Говь-Алтай аймагт очтол томоохон нефть импортлогч компаниудаас гадна “Мон суль”, “Хөрс” зэрэг хувийн жижиг шатахуун түгээх станц олон байх аж. АИ-92, дизель түлш тус бүр 1950 төгрөг атлаа хязгаарлачихсан гээд бас л өгсөнгүй. Аймгийн төвд байрлах “МТ”-ын гурван ч шатахуун түгээх станцаар орж, таньж мэдэх хүнээр нь яриулсаар сүүлийнхээс нь шатахуунтай буцав. Шатахууны нөөц дууссан, хотоос нааш гарсан гэдэг хариултыг ажилтан нь өгч байх юм. Мөн Төв аймгийн Борнуур суманд гэхэд шатахуун олгохгүй дөрөв, тав хоножээ. Нөөц дууссан гэдэг шалтгаанаар олгохгүй байснаа хоёр хоногийн өмнө үнээ 150 төгрөгөөр нэмж “Далай” шатахуун түгээх станц дизель түлшийг 1850 төгрөгөөр зарж эхэлжээ. 
Борнуур сумын иргэн Х.Баатарын хэлснээр дизель түлшийг 2500 төгрөгөөр иргэд зарж байгааг хэлсэн юм. Түүнээс зарим зүйлийг тодрууллаа.
-Борнуурын хэмжээнд шатахуун байнга хомсддог юм уу?
-Жирийн үед гайгүй. Хавар тариалалтын өмнө, намар ургац хураалттай зэрэгцээд л хомсдчихдог. Орон нутгийн сонгуультай холбоотой шатахууны хомсдол үүсгэлээ л гээд хүмүүс яриад байгаа. Хараад байхад үнэн ч юм шиг. МАН-ын нөхдүүд нь машинтайгаа өдөржин явж сурталчилгаа хийгээд давхиад л байх юм. Нөгөө хоёр нам нь түлшгүй гээд хүмүүс нь явган ухуулга хийгээд айлуудаар явж байгаа харагдсан. Тэгэхээр орон нутгийн сонгуультай холбоотой гэдэг нь үнэн юм болов уу гэж бодсон.
-Иргэд хувиараа 2500 төгрөгөөр дизель түлш зарж байгаа гэх юм. Байнга зардаг юм уу. Хаанаас ингэж нөөцөлж авдаг юм бэ?
-Хоёр, гурван айл ийм өндөр үнээр шатахуун зарж байгаа. Манайхан чинь байнга хот руу ногоогоо ачиж явдаг болохоор өндөр үнэтэй ч, авахгүй гээд яах юм билээ. Гар дээрээс зараад байгаа хүмүүсээс хаанаас түлш авсныг нь асуухаар колонкоос гэж байхгүй юу. Тэгэхээр нэг талаар хиймэл хомсдол үүсгээд нөгөө талаар хуйвалдаж үнэ өсгөж ашиг олоод байгаа гэхээс өөр юу гэхэв дээ.
