МАН-ын дарга Л.Оюун-Эрдэнэ сонгуулийн үр дүнтэй холбоотой мэдээлэл хийж байна.

Тэрбээр "Дарга төвтэй байсан тогтолцоо зөвхөн нутаг дэвсгэрийн нэгжид тулгуурласан төлөөллийн зарчим болж байна. Өнөөдөр анх удаа 34 жилийн түүхэнд 5-6 нам парламентад суух болж байна гэсэн мэдээлэл ирж байгаа нь ардчилалд шинэ хуудас нээж байна. Үндсэн хуулийн нэмэлт өөрчлөлтийг хийсэн бүх намын төлөөлөлд талархал илэрхийлье. АН, ХҮН намынханд энэ өөрчлөлтийг хийж чадсанд талархаж байна.

МАН урьдчилсан байдлаар 68-70 суудалтай болох тооцоолол ирж, ялалт байгуулж байна. Энэ бол МАН-ын ялалт гэхээс илүүтэй ард түмний ялалт. Ард түмний дуу хоолой парламентад орж ирж буй цоо шинэ үзэл санааны том реформ болж буйгаар Монгол Улсын парламентад түүх болж үлдэнэ.

Одоо бид шинэ 30 жилийн тогтолцоонд дасах ёстой. Шинэ дэгээр явна, намууд бодлогын нам болно, намын дэргэд судалгааны хүрээлэнгүүд бий болно, үзэл баримтлалаараа мэтгэлцэнэ, ард түмний санал гээгдэхгүй. Өнөөдөр санал өгөх үедээ маш сэтгэл хангалуун байсан зүйл бол 1990 онд Монголын ард түмэн идэвхтэй, ардчилалдаа сэтгэл хангалуунаар өндөр ирц бүрдүүлж, төлөөллийн төв байгууллага парламентыг бүрдүүлэх гэж саналаа өгсөн. Ардчилсан хувьсгал анхдагч үнэт зүйлдээ эргэн ирэх ард түмний дуу хоолой болж байна.

Үзэл бодлын ялгаатай байдлыг хүндэтгэж, үйл ажиллагаандаа тусгаж явах болно. Монгол Улсад шинэ 30 жил, парламентын ардчиллын хоёр дахь давлагаа эхэлж байна" гэлээ.