МЗЭ-ийн шагналт зохиолч Х.Болор-Эрдэнэ бага насны үнэнч анд болох нохойгоо дурсаж “Хишигт” нэртэй тууж хэвлүүлэн хүүхэд багачуудын номын санд хандивласан юм. Энэхүү номыг анх гарсан даруйд тэрээр нийслэлийн 1700 хүүхдэд олон улсын хүүхдийн баярын бэлэг болгон үнэгүй түгээсэн бөгөөд нийслэлийн дунд сургуулиудын номын санд хандив болгон өгч, номын баяраа хүүхдүүдтэй хамт тэмдэглэн өнгөрүүлсэн билээ. “Хишигт” тууж ч уншсан хүүхэд бүрийнхээ сэтгэлд үерхэл нөхөрлөлийн үнэ цэнэ, бусдыг хайрлах тухай бас нэгэн сонирхолтой хичээлийг зааж өгсөн юм. Түүний номыг худалдаанд хэдийнэ байхгүй болчихсон хойно үлдсэн ганц ширхэгийг нь дунд сургуулийнхан гараас гарт дамжуулан уншиж, номын тэмдэглэл хөтөлж, зарим нь зохиолчийг урьж, сонирхолтой уулзалтуудыг ч хийгээд амжсан юм. Зохиолч хэлэхдээ “Хишигт тууж маань олон хөөрхөн хүүхдүүдийн хайр гэрэлтсэн харцыг илгээж, олон томчуудын дурсамжийг сэргээн анд нөхөр болгохоор над руу илгээсээр байна. Тиймээс Хишигт маань одоо ч бидний дунд намайг хайрласан хэвээр, амьд сэрүүн явж байна уу хэмээн заримдаа санахад хүргэдэг. Тэр надад анх орчлон хорвоо дээрх юмс үзэгдлийг, байгалийг, бас хүн чанарыг хайрлах том хичээлийг зааж, зөвхөн тэр л зорилгоор миний төлөө, гэр бүлийн маань төлөө амиа өгсөн гайхалтай нохой байсан юм. Тийм сайхан анд нөхрөө алдчихсандаа насан туршдаа харамсаж явдаг тул энэхүү туужийг бичсэн билээ” хэмээн ярьсан юм. Үнэхээр “Хишигт” дурсамжит тууж хүүхдүүдийг номын хорхойтон болгож, томчуудыг бага насаа дурсан санаа алдахад хүргэсэн энгийн хэрнээ гайхалтай зохиол болсон юм. Худалдаанд хэдийнэ байхгүй болсон “Хишигт” туужийг зохиолч саяхан уншигчиддаа шинэ оны бэлэг болгон дахин хэвлүүлжээ.
