2013 оны могой жил нь бүхэлдээ амжилт, ажлаар дүүрэн, шударга сонголт, хуваарилалт, эрх тэгш байдлыг хүн бүрт бэлэглэнэ хэмээн од гаригс хэлж байна.
Могой бол үргэлж айдас дагуулж байдаг амьтан. Хурдан хөдөлж, золиосоо амархан хордуулах чадвартай бөгөөд хор нь хүнийг үхлийн аюулд ч хүргэдэг гэдгийг та юу эс андах билээ. Тэд таны боддог шиг үргэлж аймшигтай байдаг амьтан биш. Хэрвээ та өөрөө л өдөхгүй бол тэр хэзээ ч түрүүлж тань рүү дайрахгүй. Үзэн ядаад байдаг тэрхүү үхлийн аюултай хороор нь эрүүл мэндэд тустай эм хийдэг. Могой бол Хятадын уламжлалт ёсонд цэцэн ухаан, уужуу бодлын бэлгэдэл. Гэвч хар санаат гэж тодорхойлдог могой нь үргэлж өөрийн сэтгэл хөдлөлөөр асуудалд ханддаг, хэзээ ч эргэн тойрныхоо хүмүүсийн саналыг сонсдоггүй учраас 2013 онд олон хүн огт бодож төлөвлөж байгаагүй үйл явдлаас болж цочирдож, алмайрч болзошгүй юм.
Хэдийгээр барууны орнуудад могойг тийм ч таатай хүлээж авдаггүй ч дорно дахинд бол цэцэн ухааны бэлгэ тэмдэг гэхээс илүүтэйгээр гоо үзэсгэлэнгийн бэлгэдэл гэж үзэж үргэлж эмэгтэй хүнтэй жишдэг билээ. Хятадын зурхайгаар усан могой буюу хар могой жил нь 2013 оны хоёрдугаар сарын 10-наас 2014 оны нэгдүгээр сарын 31 хүртэл үргэлжлэх юм. Усан могой жил нь хуурамч, тогтворгүй учраас ирэх жил хүмүүс аливаа шийдвэр гаргахдаа үргэлж бодлоготой хандах хэрэгтэй. Могой нь уужуу бодлын илэрхийлэл болж аливааг тунгаан боддог хүмүүст дуртай байдаг.
Могой бол сайн муу хоёр талтай бас хар санаатай амьтан гэдэг юм. Нэг талаас тэр бол хүйтэн хөндий ч нөгөө талаас маш удаан боддог, үнэлж цэгнэж чаддаг. Могой жил нь оюун ухаан зарсан ажил хөдөлмөр эрхлэгчдэд ээлтэй байдаг гэж үздэг. Өөрөөр хэлбэл, эрдэмтэн, шинжээч судлаач, улстөрч, багш нарт ээлтэй. Идэвхтэй амьдралтай хүмүүст бол тийм ч таатай жил биш. Жилийн эзэн амьтан яаруу сандруу биш учраас идэвхтэй хурдан амьдралд дургүй. 2013 он танаас тун их философлиг байдлыг шаардах учраас үргэлж эхлээд бод гэж өөртөө хэлж байхад гэмгүй.
Могой бол даяанч бодгаль учраас элдэв зүйлд их мөнгө зарахад дургүй. Тиймээс та юунд мөнгө зарцуулахаа, мөнгө зарцуулсан зүйлээ хэрхэн ашиглах вэ гэдгээ нэг бодоод үзэхэд гэмгүй. Могой бол маш тооцоотой хүйтэн нөхөр учраас гайхалтай уулзалт, романтик болзооны талаар энэ жилдээ мөрөөдөөд дэмий л болов уу. Гэхдээ могой жилд учирсан хосууд заяаны хань байдаг гэдэг үгийг санаж байхад гэмгүй. Өөрийн тогтоосон харилцаандаа хөнгөмсгөөр хандагчдын хувьд могой сүүлээ шарваж үзүүлэх болно. Хэрвээ та өөрийн сонгосон хүндээ үнэн сэтгэлээсээ хандаж чадвал насан туршийн хайр халамжаа олно гэдэгт эргэлзэх хэрэггүй.
Японы зурхайчдын бичсэнээр 2013 оны нэгдүгээр сарын 24-нөөс могой жил эхэлнэ. Японы зурхайчид энэ онд анагаах ухааны судалгаа шинжилгээ, үйлдвэрлэлийн салбар, судалгааны ажил гэх зэрэг эрдэм шинжилгээний салбар, боловсролынхонд ээлтэй тул тэдэнд мөнгө зарахад гэмгүй гэжээ. Харин улс төрийн амьдрал тийм ч таатай уур амьсгалтай байж чадахгүй. Улс төр дотоод гадаад самуунаар дүүрэн байх учраас дарга цэрэг өөрчлөгдөх, ард түмэн шинэ сонголт хийх, улсыг өөр бодлогоор, өөр нүдээр удирдах гээд үргэлж хөдөлгөөн дунд байх нь. Олон улсын харилцаа улс төрийн байдалд могой үргэлж ууртай догшин байдлаар хандах нь. Улс төрийн дотоод зөрчилдөөн ч үргэлжилсээр байх аж. Хамгийн гол нь, могой баячуудаас авч ядууст тараах тэр л замыг сонгосон гэжээ.
Оны эхэнд могой бүхий л анхаарлаа улс төр, улстөрчдөд хандуулна. Харин хүмүүсийн хувьд материаллаг тал дээр жаахан дутагдалтай амьдрах нь. Олон хүний хувьд орон сууцаа сайжруулж, гэр орноо тохижуулах боломж хомс ч ажил хийж байгаа хүнд албан тушаал ахих боломжийг харамгүй хайрлах юм.
Нэг дор олон зүйлийг олж авч чадна хэмээн мөрөөдөгсдийн мөрөөдөл замхран алга болно. 2013 оны хоёрдугаар сар нь жирийн ажилчид албан хаагчдын хувьд ямар ч өөрчлөлтгүй сар байх бол улс төрийн хүрээнийхний хувьд шинэ төсөл хөтөлбөр, шинэ реформоор дүүрэн байх гэнэ. Олонхи лидер нэр хүндийн оргил рүү мацах тэмүүлэлдээ дийлдэн улс төр рүү зүтгэж, улс төрөөс хэн нь тэднийг дэмжиж түшиж байсныг мартах болно.
Гуравдугаар сараас улс төр хийгээд төр засгийн дээд удирдлагуудын хувьд тун их хөдөлгөөнтэй байх тул та төлөвлөөгүй аливаа ажил эхлэх бусдад санал тавихаас аль болох зайлсхийсэн нь дээр. Од гаригс өөрийнхөө ажлын цаг, хийх ажил гээд алхам бүрээ төлөвлөж чадаж байгаа хүнд маш эерэг нөлөөлөл үзүүлэх нь.
Таны эмээр дарах гэж оролддог байсан өвчин чинь эмнэлэгт хандахыг таниас өөрийн эрхгүй шаардах болно. Ялангуяа үе мөчний өвчтэй хүмүүст энэ хамгийн их хамаатай асуудал. Могой хүнд бүрт өөрийн эрх, өөрийн үзэл бодол гэж байдаг гэж үздэг учраас та бусдад өөрийнхөө санааг тулгаж, өөрөө бусдын санаа бодолд автах шаардлагагүй.
Оны дундуур жинхэнэ ажлын амтыг мэдрэх болно. Ялангуяа удирдах ажилтнууд хамт олондоо шинэ хүн хүлээн авах, найрсаг харилцаа үүсгэх зэрэгт хамгийн тохиромжтой үе гэдгийг мартаж болохгүй шүү.
Зүрхээ хайрлаж байхад гэмгүй. Хавар багагүй мөнгө зарцуулах хэрэг гарч магадгүй учраас найз нөхөд, банкнаас зээл тавих гэж битгий зүтгээрэй.
2013 онд могой бүхий л ордныхонд албан тушаал хийгээд хайр сэтгэлийн их өрсөлдөөнийг илгээнэ. Могой бол маш болгоомжтой амьтан. Өөрийнхөө орон сууцанд нэг ч амьтанг оруулах дургүй. Тэгэхээр та өөрийн хүрсэн амжилт, тухтай гэр бүлдээ бусдын шунал нэвтрүүлэхгүй байхыг хичээгээрэй. Ялангуяа та маш их итгэж өөрийн найз нөхөд гэж үнэлж явдаг хүмүүсээс болгоомжилж байхад гэмгүй.
Өнөөдрийг хүртэл бусдын ард нуугдаж байсан эрдэмтэд зураачид, зохиолчид, хөгжимчдөд 2013 онд амжилт нэр алдарт хүрэх том боломж олгож байгаа юм.
