Австралийн цагдаагийн газраас “Apple”-ийн iPhone, iPad-ын газрын зураг аминд хүрэх ч аюултай шүү хэмээн хэрэглэгчдэд анхааруулжээ. Учир нь, тус улсад Apple-ийн газрын зургийг ашиглаад төөрсөн тохиолдол хэд хэдэн удаа гарчээ. Өнгөрсөн сард гэхэд зургаан хүн энэ газрын зургийн дагуу яваад эзгүй цөлд төөрч орхисон гэнэ. Тиймээс Виктория мужийн цагдаагийн газраас Аpple компанийн iOS 6 үйлдлийн систем буюу iPhone, iPad төхөөрөмжний газрын зураг заах үйлчилгээнд итгэж хол замд гарахгүй байхыг анхааруулжээ. Гар утас, таблет компьютерийнхээ газрын зургийн дагуу яваад бараг 46 хэмийн халуунтай эзгүй цөлд ямар ч утасны сүлжээгүй, бас хоол унд, ус ч үгүй газар 24 цагийн турш таг гацаж төөрсөн тохиолдол нэг биш удаа гарсан учир ийнхүү Apple-ийн хэрэглэгчдэд баталгаагүй газрын зураг ашигласнаар амь насанд ч аюултай байж мэднэ хэмээн анхааруулга өгчээ. Харин компанийн зүгээс Австралийн газар нутгийн зураг дээр гаргасан алдаагаа даруйхан залруулж байгаагаа мэдэгджээ. Ер нь, Apple-ийн газрын зурагт алдаа гарах нь нэлээд элбэг тохиолддог. Тухайлбал, Англид гэхэд зарим жижиг хотуудыг ор тэмдэглээгүй орхисон байх нь ч бий.
