Түвдийн Кайлас уулын дэргэдэх Гьяндрек сүмийн лам 2012 оны арванхоёр дугаар сарын 21-нд ертөнцийн төгсгөл болно гэж Америкийн сансар судлалын НАСА агентлагт хандаж мэдэгджээ. Түүний хэлснээр бол энэ өдөр манай дэлхий нарны системээс гарч “тэг зурвас”-т орох юм байна.
Ламын хэлж байгаагаар бол энэ үйл явдал Улаанбаатарын цагаар өдрийн 14.00 цаг гэхэд дэлхий даяараа таг харанхуй, нам гүм болох гэнэ. Харин нар хаашаа алга болох, дэлхийг харанхуй орхиод юуг гэрэлтүүлж байх талаар лам тодорхой хэлээгүй байна. Тэгээд бас цахилгаан холбоо, дуу чимээ гээд хүний бий болгосон зохиомол хэрэгсэл бүгд ажиллахгүй гэнэ. Энэ бүхнийгээ дэлхий өнөөх “тэг зурвас”-т орсонтой холбоотой тайлбарлаж байна. “Тэг зурвас” гэдэг нь цахилгаан соронзон орон болохоор ямар ч энерги тархах боломжгүй болж юу ч ажиллахгүй тийм орон зайг хэлж байгаа юм” гэж лам хэлжээ. Гэхдээ лам бас хүмүүсийг тайвшруулах зүйл хэлжээ. Тэрээр хүмүүсийг сандралдаж үймж тэвдэх хэрэггүй. Энэ харанхуй мөнхийн биш, хэдэн өдөр л үргэлжилнэ. Магадгүй гурав, дөрөв хоног л. Энэ хугацаанд бүр ч таг харанхуй болчихгүй, сансрын өөр бусад биетээс гэрэл дамжин үзэгдэнэ гэсэн байна.
Амьтад л эхлээд мэдэрнэ
2012 оны 12 дугаар сарын 21-ний ертөнцийн төгсгөлийг амьтад эхлээд мэднэ гэнэ. Ичээнд ордоггүй амьтад эхлээд нүх, орон байраа орхин гарч давхилдах юм байна. Хүмүүсийн хувьд гэнэт л тулгарна. Түвдийн лам бас хамгийн аймшигтай нь ертөнцийн төгсгөлийн улмаас манай гаригийн хүн амын 10 хувь нь үхнэ гэжээ.
Ертөнцийн төгсгөл хоёр долоо хоног үргэлжилнэ. Хоёр долоо хоног болоод ертөнцөд гэрэл гэгээ эргэн ирнэ. Энэ аймшигт явдал ердөө л хоёр долоо хоног үргэлжилнэ. Хүмүүс арванхоёрдугаар сарын 21-ний ертөнцийн төгсгөлийн уршгийг арилгах ажилдаа орох ч манай дэлхий “Тэг зурвас”-аас ирэх оны хоёрдугаар сарын 7-нд бүрэн гарна. Гэхдээ манай дэлхий дээр цахилгаан эрчим хүч, тээврийн үйлчилгээ ээлж дараатайгаар сэргэнэ. Ингээд 2013 оны гуравдугаар сар гэхэд амьдрал хэвийн болно.
Түвдийн зөнч лам ертөнцийн энэ төгсгөл гэдэг нь хүмүүсийг эрс өөрчилнө гэсэн байна. Хүмүүс материаллаг үнэт зүйл рүү илүү тэмүүлэхээ больж сэтгэлгээний хөгжлийг илүүд үзэх болно. “Энэ бол он цагийн уртад хүн төрөлхтний хөгжил дэвшилд маш чухал түлхэц болно” гэж түвдийн лам хэлжээ.
Түвдийн ламын зөвлөгөө. Түвдийн лам зүгээр ч нэг ертөнцийн төгсгөл болно гээд орхисонгүй энэ үеэр хүмүүс биеэ яаж авч явах талаар НАСА-д хэд хэдэн зөвлөгөө өгчээ.
1. 2012 оныхоо бүх ажлыг амжуулж, бүхий л өр ширээ барагдуул, шинэ холбоо харилцаа битгий тогтоо
2. Энэ өдөр буюу арванхоёрдугаар сарын 20-нд бүх хүүхдүүдээ цуглуулж, бичиг баримтаа биедээ авч яв, цэвэр агаарт гар. Хоёр сарын дараа эрчим хүч сэргэтэл хүрэлцэх түлш, лаа, ус, хүнсний зүйл нөөцөлж авах хэрэгтэй.
3. “Харанхуй өдөр”-үүдэд цонхоо хааж, гадаад ертөнцөөс ангид байн нүд чихээ амраан гадагшаа гарахгүй байх хэрэгтэй
Арванхоёрдугаар сарын 21-нд ертөнцийн төгсгөл болох уу, үгүй юу.
Яахав түвдийн лам ингэж хэлсэн байна. Гэхдээ энэ бол шинжлэх ухааны баталгаа нотолгоо биш. Үүнд итгэх үү, үгүй юу. 1967 онд манай дэлхий Икар гаригтай мөргөлдөнө гэж баахан цуурсан. Гэтэл ийм явдал болоогүй. Яг үнэндээ шинжлэх ухааны талаас, одон орон судлалын зүгээс ийм явдал болно гэж албан ёсоор хэн ч хэлээгүй л байна даа.
