Алдарт “Касабланка” дэлгэцэнд гарснаас хойш 60 жилийн дараа хоёрдугаар анги нь мэндэлж магадгүй нь. Бүх цаг үеийн хамгийн шилдэг киноны нэг гэгддэг энэ киноны үргэлжлэлийг хийхээр “Warner Bros” судалж байгаа гэнэ. Уг нь, киноны хоёрдугаар ангийг зохиолыг зохиолч Ховард Кох амьд сэрүүндээ аль хэдийнэ бичээд, бэлэн болгосон байжээ. Тиймээс зохиолыг нь ашиглаад кино хийх санааг “Warner Bros” гаргаж, хөрөнгө оруулагч болон кино хийх уран бүтээлчдийг хайж байгаа аж. Хэвлэлүүдэд гарч буй шумаар бол “Касабланка 2”-ын зохиолын үйл явдал “Ильза Касабланкаг орхисны дараа бие давхар болсноо мэдэж, Америкт ирж хүүхдээ өсгөнө. Ингээд 20 гаруй жилийн дараа Рик Блэйн, Ильза хоёрын хүү Ричард Блэйн хэмээх залуу Касабланкад эргэн ирж, аавыгаа хайж буйгаар” өрнөх аж. Хэдийгээр киноны үргэлжлэлийг зохиолчид нь өөрсдөө бичсэн боловч бусад кино шиг хоёрдугаар ангийг нь хийх гээд баллаад хаях вий гэсэн болгоомжлол Холливудынханд байгаа гэнэ. Тийм ч учраас “Касабланка-2”-ыг зүрхлэн хийх уран бүтээлчид болоод хөрөнгө оруулагчид одоогоор олдоогүй байгаа аж.
