“Ном бол ертөнцийг харах цонх” гэдэг үгийн үнэ цэнэ өдий хүртэл алдагдаагүй, цаашдаа ч алдахгүй биз. Сүүлийн жилүүдэд цахим мэдээллийн хэрэгсэл олширч үүнд ном өөрийн байр сууриа алдаж байна гэж олон хүн өгүүлдэг ч бид ном уншсан хэвээр л байна. Өөрийн мэдэхгүй зүйлийг номноос л мэдэж авдаг. Тиймдээ ч ном бүтээх ажлыг хүн бүр энэ насандаа хийх ёстой буянуудын нэг гэх нь ч бий. Ном бүтээн туурвидаг хэвлэлийн үйлдвэр манай оронд үүсч хөгжөөд зуун жилийг ардаа үджээ. 1912 онд анхны хэвлэх үйлдвэр байгуулагдсан бол эдүгээ хорь гаруй үйлдвэр ажиллах болж. Техник технологийн хувьд ч хуучнаа бодвол илүү сайжирсан. Энэ ойн арга хэмжээний хүрээнд Монголын хэвлэлийн үйлдвэрийн холбооны гишүүн 23 хэвлэх үйлдвэр өөрсдийн хэвлэсэн хамгийн эрэлт ихтэй 4815 номыг Үндэсний төв номын санд хандивлалаа. Албан байгууллагууд баярын өдрөөрөө өөрсдөө баярлаад өнгөрдөг бол хэвлэх үйлдвэрийнхэн маань хүүхэд залуучуудын оюунд хөрөнгө оруулалт хийж байгаа нь энэ.
