1912 онд живсэн домогт Титаник хөлөг онгоцны үлдэгдлийг үзэхээр явж байсан Титан шумбагч робот сүйрч, дотор нь явсан таван зорчигч амиа алдсаныг АНУ-ын Эргийн харуулаас мэдэгдлээ. Шумбагч хөлгийн конус хэлбэртэй урд хошуу, хойд талын бүрхүүл зэрэг таван хэсэг, эд анги Титаник хөлгийн хитгээс 500 метрийн зайд олджээ. Эргийн харуулын контрадмирал Жон Маугер “Олдсон хэсгүүдээс харахад шумбагч хөлгийн урд хэсэгт хүчтэй дэлбэрэлт болсон нь тодорхой байна.
Шалгалт үргэлжилж байна” хэмээн ярилаа. Титан шумбагч хөлөг 1912 онд живсэн, 3.800 метрийн гүнд далайн ёроолд байгаа Титаник хөлгийг үзэхээр шумбаад өнгөрсөн бүтэн сайн өдөр холбоо тасарчээ. Тус шумбагч төхөөрөмжид OceanGate Expeditions компанийг үүсгэн байгуулагч, шумбагч хөлгийн эзэн 61 настай Стоктон Раш, Пакистаны бизнесмэн, 48 настай Шахзад Давуд, түүний хүү Сулеман Давуд, Британийн тэрбумтан, 58 настай Хамиш Хардин, франц судлаач, 77 настай Пол-Анри Наргелот нар сууж явжээ. Сураггүй болоод байсан Титан хөлгийн эрэл хайгуулд Америк, Канад, Их Британи, Францын техник, аврагчид оролцож байна.
