Оскарын шагнал гардуулах 95 дахь удаагийн ёслол АНУ-ын Лос-Анжелес хотноо эхэллээ. Энэ удаагийн наадмыг Америкийн хөтлөгч Жимми Киммел хөтлөн явуулж байна.
Холливудын алдартай “А” зэрэглэлийн уран бүтээлчдийн төлөөлөл болсон олон эрхмүүд “Dolby” театрын гадаа дэвссэн оргилуун дарсны өнгөтэй хивсэн дээгүүр алхлаа.
“Шилдэг хүүхэлдэйн кино”, “Шилдэг эрэгтэй туслах дүр”-ийн шагналыг хамгийн эхэнд гардуулах бөгөөд “Pinocchio” хүүхэлдэйн кино болон Вьетнам-Америк гаралтай жүжигчин Ке Хью Кван нар хүртэх магадлал өндөр байна.
Эдгээр шагналын эздийг тодруулсны дараа зарлахад хамгийн хүнд төрлүүдийн нэг гэгддэг “Шилдэг эмэгтэй туслах дүр”-ийг шалгаруулна. Энэхүү төрөлд Ирландын жүжигчин Керри Кондон, Америкийн жүжигчид Анжела Бассет, Жейми Ли Кертис нарын жүжигчид өрсөлдөж байна.
