АНУ-ын Калифорни мужийн Сан Хосегийн шүүхээс БНСУ-ын “Samsung” компанийг зохиогчийн эрхийн хууль зөрчиж, “Apple” –ийн бүтээгдэхүүнийг хуулбарласан хэмээн үзэж, 1,05 тэрбум ам.долларын торгууль ногдуулжээ. “Samsung”-ийн зарим смартфон, тухайлбал Galaxy S 4G загварын утас нь “Apple”-ийг бүтээгдэхүүн iPhone-ий гадаад үзэмж болоод дүрс, текстээ үзүүлэх хэлбэрийг нь дуурайсан, гараараа дүрс текстийг томруулах үйлдлийг нь хуулбарласан гэх мэт шалтгаанаар зохиогчийн эрх зөрчсөн гэж үзжээ. Нэгэнт шүүхээс “Samsung”-ийг буруутай гэж үзсэн тул өрсөлдөгч компанийнхаа хохиролыг барагдуулах ёстой хэмээн тэрбум ам.долларын торгууль бичжээ. Энэ нь “Apple”-ийн нэхэмжилсэн 2,5 тэрбум ам.долларын хагастай нь ч тэнцэхгүй боловч “Samsung” компанийн хувьд хүнд цохилт болоод байна. Тус компани АНУ-ын шүүхийн шийдвэрийг “Зохиогчийн эрхийн хуулийг ашиглаж смартфоны зах зээлд ганцхан компанид ноёрхлоо тогтоох гэсэн хэрэг” хэмээн үзэж, давж заалдана гэдгээ мэдэгдлээ. “Samsung” компани мэдэгдэлдээ “Энэ шүүхийн шийдвэрийн улмаас америкчууд шинэчлэл дэвшил үгүй, өндөр үнэтэй, цөөн тооны сонголттой л үлдэх болно” гэж дурджээ.
Смартфоны зах зээлийн тал хувийг хуваан эзэмшдэг дээрх хоёр компани зохиогчийн эрхийн асуудлаар хэдэн жилийн өмнөөс бие биенээ ээлжлэн шүүхэд өгсөөр ирсэн. Өнгөрсөн долоо хоногт гэхэд БНСУ-ын шүүхээр мөн тэдний гомдлыг авч хэлэлцээд, хоёулаа зохиогчийн эрхийг зөрчин, тус тусынхаа бүтээгдэхүүнээс хуулбарласан байна гэж үзээд хоёуланд нь торгууль ногдуулсан юм. Гэхдээ тус шүүхийн шийдвэрээр “Samsung”-ийн төлөх торгууль нь илүү гарсан юм. Их Британийн шүүхэд ч тус компанийн зохиогчийн эрхийн тухай гомдол хүлээн авсан бөгөөд саяхан хэрэгсэхгүй болгож, хаасан билээ.
