Энэтхэг улсад төвтэй дэлхийн дөрвөн улсад үйл ажиллагаа явуулдаг Apollo эмнэлгийн Элэг болон хавдрын тасгийн дарга, зөвлөх нар манай улсад ирж үнэ төлбөргүй үзлэг оношилгоо хийхээр болжээ. Тус эмнэлэг нь 1983 онд байгуулагдсан бөгөөд оношилгооны чиглэлээр дэлхийн дөрвөн улсад 60 гаруй салбар, 40 гаруй мянган ажилтантайгаар үйл ажиллагаа явуулдаг юм байна. Тус эмнэлгийн Элэг нойр булчирхайн хагалгааны тасгийн дарга Dr.Neerav Goyal элэгний үзлэг хийх аж. Тэрээр 1991 оноос хойш ажилласан туршлагатай бөгөөд Энэтхэг дэх элэг шилжүүлэн суулгах амжилттай хагалгааны анхны тохиолдлууд дээр ажиллаж байсан туршлагатай эмч юм байна. Мөн элэгний хагалгааны чиглэлийн олон улсын конференциудад тогтмол уригдаж илтгэл тавьдаг бөгөөд энэ чиглэлийн эрдэм шинжилгээний олон ажил хийсэн, туршлагатай нэр хүндтэй эмч аж. Харин хавдрын үзлэг хий эмч Dr. Sameer Kaul нь Энэтхэгийн Apollo эмнэлгийн Хавдрын мэс заслын тасгийн зөвлөх эмч. Америкийн хавдрын нийгэмлэгийн зөвлөх, Энэтхэгийн Засгийн газрын хавдрын зөвлөх зэрэг олон улсын нэр хүндтэй ажлуудыг хашиж байсан туршлагатай. Олон улсад нэр хүнд бүхий хавдрын эмч ажээ. Үзлэг нь үнэ төлбөргүй бөгөөд 7500-0828 утсаар холбогдож үзүүлэх хүний овог нэр, өвчний онош, утасны дугаараа хэлж бүртгүүлэх юм байна. Үзлэг энэ сарын 20-нд болно.