УИХ, Засгийн газар, Монголбанк хамтран орон сууцны найман хувийн хүүтэй ипотекийн зээлийг 2013 оноос амжилттай хэрэгжүүлж байгаа билээ. Энэ хугацаанд 78 мянга гаруй өрх орон сууцанд ороод байгаа юм. Ипотекийн зээлийн эргэн төлөлт 90 гаруй хувьтай байгаа аж. Ингэснээр дараа дараагийн зээлийн эх үүсвэр бүрдэж, найдвартай болж буй нь сайн үзүүлэлт хэмээн Монголын ипотекийн корпорац онцоллоо. 
МИК-ын захирал Д.Гантөгс “Найман хувийн хүүтэй, ипотекийн хөтөлбөрийн хүрээнд 2.4 их наяд төгрөгийг олгосон. Орон сууцны зээл авсан иргэд ч хариуцлага сайтай зээлээ төлдөг” гэж байлаа. Банкуудын хувьд ч гэсэн авч үзэхэд ипотекийн зээлийн төлөлт хангалттай сайн байгааг хэлдэг. 78 мянган өрхийн 47,5 мянгад нь МИК үнэт цаас болгон банкуудад нийлүүлж буй юм. Орон сууцны зээлээр баталгаажсан бондын төлбөр сайн яваа аж. Хоёр жил гаруйн хугацаанд бонд гаргаснаар эзэмшигч байгууллагууд болон банкуудад нийтдээ 250 гаруй тэрбум р эргүүлэн төлсөн талаар МИК-ын захирал Д.Гантөгс ярьсан. Өнгөрсөн хугацаанд МИК 2.2 их наяд төгрөгийн үнэт цаас гаргасан байна. Энэ нь нийт эдийн засгийн 10 хувьд нь тус корпорацын гаргасан үнэт цаас эргэлдэж буй гэсэн үг юм. Үүний цаана зээлээ сар бүр төлж буй иргэдийн эргэн төлөлт бий гэж ч тайлбарлаж болно.
МИК энэ жил 600 тэрбум төгрөгийн үнэт цаас гаргахаар төлөвлөжээ. Ипотекийн зээлдэгчдийн 90 гаруй хувь нь найдвартай зээлдэгч байгаа нь УИХ, Засгийн газраас гаргасан хөтөлбөрийн үр дүн учир сайн мэдээ болгон онцолж байна.
