Социалист систем оршин тогтнож байхад хуучин Зөвлөлт холбоот улс түнш орнууддаа дэмжин цэрэг, эдийн засгийн асар их тусламж дэмжлэг үзүүлж байсан нь хуримтлагдаад шинэ Орос гүрэн дэлхийн улс орнуудаас асар их авлагатай үлдсэн. Гэхдээ зарим улс орон төлөх чадаргүй байхад зарим нь шилжих рубль зэрэг төлбөрийн хэлбэр, нөхцөл дээрээ санал нийлэхгүй байсан нь ч бий. Ингээд ОХУ дэлхийн улс орнуудаас авал авлагаа ээлж дараалан чөлөөлсөн нь бий. Аль улсын хэдий өрийг чөлөөлсөн бэ.
Хамгийн их өрийг нь чөлөөлсөн 10 орны тоонд Монгол Улс орж байна.

Кубын 31,7 тэрбум ам.доллар

Шинжээчдийнхээр бол  энэ өрийг Кубээс хэзээ ч авахгүй өнгөрөх ёстой  гэнэ. Энэ бол ердөө АНУ-ын бөөрөнд зөвлөлтийн байр суурийг бэхжүүлэхэд л зарцуулсан.

Иракын 21,3 тэрбум ам.доллар

Энэ өрийг хоёр тасалж чөлөөлсөн. 2004 онд 9,5 тэрбумыг, 2008 онд 12 тэрбумыг чөлөөлжээ. Хоёр дахь удаа чөлөөлөхөд эхний чөлөөлснөөс хойш буюу 2004 оноос хойш хуримтлагдсан өр бас орсон.

Африкийн орнуудын 20 тэрбум доллар

Ахдүүгийн тусламж гэж олгосноос үүссэн энэ өрийг 2008 онд бөөнөөр нь чөлөөлсөн.

Монголын 11,1 тэрбум доллар

2003 оны арванхоёрдугаар сард 98,5 хувийг нь чөлөөлсөн бол үлдсэн 174,2 сая долларын өрийг 2016 оны нэгдүгээр сард чөлөөлсөн. Одоо Монгол Улс зөвхөн 3,8 сая долларын өртэй үлдсэн.

Афганистаны 11 тэрбум доллар

Зөвлөлтийн цэргийн зэвсэг, техник худалдсаны энэ өрийг 2006 онд чөлөөлсөн.

Умард Солонгосын 10 тэрбум доллар

ОХУ өөрийн түнш Умард Солонгосын өрийг хамгийн сүүлд 2012 онд чөлөөлж одоо нэг тэрбум долларын өр үлдсэн.
 
Сирийн 9,8 тэрбум доллар

Нийт 13,4 тэрбум долларын өрөөс 2005 онд 9,8 тэрбумыг нь чөлөөлсөн.

Вьетнамын 9,53 тэрбум доллар

Путины үед гадаадын өрөөс хамгийн түрүүнээ эдний өрийг 2000 онд чөлөөлсөн. Тэр үед Вьетнамын нийт өр 11,03 тэрбум байснаас үлдэгдлийг 2022 онд төлөхөөр үлдээсэн.

Эфиопийн 6 тэрбум доллар

Нийт 6 тэрбум долларын өрөөс 2001 онд 4,8 тэрбумыг нь чөлөөлж дөрвөн жилийн дараа 1,1 тэрбум долларыг нь бас чөлөөлж бараг дуусгасан.

Алжирын 4,7 тэрбум доллар

2006-2007 онд чөлөөлж дуусгасан. Оронд нь Алжир оросын бүтээгдхүүнийг их хэмжээгээр худалдан авах үүрэг хүлээсэн.

Сүүлийн жилүүдэд 2012-2014 онд Умард Солонгос, Кубээс гадна Киргизийн 599 сая, Узбекийн 865 сая долларын өрийг бас чөлөөлсөн байна.
ОХУ ингэж 2000 оноос хойш гадаад орнуудас авах ёстой байсан 140 тэрбум долларын өрийг чөлөөлжээ.

Орос яагаад гадаад орнуудын өрийг чөлөөлдөг вэ

“Бид өөрсдөө ийм их мөнгөтэй юм уу” гэж шинжээчид гайхдаг.
Өмнө нь Орос Их-20-ийн гишүүний хувьд өөрийнхөө байр суурийг бэхжүүлэх сонирхолтой байлаа. Өөрөөр хэлбэл энэ байгууллагын хүрээнд нэр хүндээ өсгөх сонирхол байсан гэж Сангийн сайд асан Алексей Кудрин хэлж байна. Одоо бол ийм орчин байхгүй.

-Өр чөлөөлөх бүрт Куба, Никарагуа ч юм уу, Умард Солонгост оросын компаниуд нэвтэрч ажиллах таатай боломж бүрдэж байгаа гэж Гайдарын нэрэмжил хүрээлэнгийн Михаил Хромов хэлээд, гэхдээ өр чөлөөлсний дараа ямар нэгэн гэрээ хэлцэл хийгээд нөхцөл байдал сайжирсан жишээ нэг ч харагдахгүй байна гэсэн байна.
Өөр нэг зүйл бол хуучин ЗХУ-ын үеийн өр төлөгдөх найдвар бага. Ялангуяа Куба, Никарагуад энэ хамаатай.

Энэ талаар оросын иргэд ингэж хариулж байна.
-Ийм их авлагаа  манай орон чөлөөлөөд байх нь зөв үү?

Театр киноны жүжигчин Михаил Державин:
-Энэ нь манай төсөвт нэг их хүндрэл учруулахгүй бол чөлөөлөх нь ч яахав дээ. Манай улсын удирдагчид ухаантай хүмүүс болохоор энэ бүхнийг нарийн тооцож байгаа байлгүй дээ.

ТУХН-ийн орнуудын хүрээлэнгийн захирал Константин Затулин:
-Өөрийгөө хайрлуулахын тулд бага зэргийн заль байх хэрэгтэй л дээ. Одоо бол төлөх чадваргүй бол Узбекийг өрөө төл гэж шаардах хэрэггүй. Харин Белорус зэрэгт бол хориг тавихад гэмгүй.

Санкт –Петербургийн их сургуулийн улстөрийн тэнхимийн эрхлэгч Ольга Попова:
Бид их өртэй ч гэсэн сайн хөршийн харилцаатай орнуудаа дэмжих ёстой. Энэ тийм их үнэ цэнэтэй гэж үү.

Дуучин, багш, жүжигчин Владимир Винокур:
Узбек бол Дундад азийн манай хөрш, Өрийг чөлөөлөх нь зөв гэж би бодож байна. Манай эцэг “хүмүүст туслаад хариу бүү нэх” гэдэг байсан. Үр дүн нь заавал гарна.

Краснодарын хязгаарын депутат Николай Петропавловский:
-Өр чөлөөлнө гэдэг христианы уламжлалт ажил.  Яахав улс орны удирдагчийн хувьд энэ бол шашин биш л дээ. Ямар ч тохиолдолд бид мөсөн уулын оройг л хардагаас биш усан дор юу байгааг нь мэддэггүйтэй адил ийм шийдвэрийг шүүн хэлэлцэж төрийн бодлогыг шүүмжлэх нь таагүй зүйл.
 
Эрчүүдийн сүмийн ламтан эцэг Геронтий:
Өнөөгийн нөхцөлд Орос холбоотнуудынхаа өрийг чөлөөлөх хэрэгтэй. Шашны үүднээс авч үзвэл биднийг сэтгэл зүрхнээсээ хайрлаж хүндэлж байгаа нөхцөлд өрийг нь чөлөөлж чаддаг байх ёстой.