Германы Кельн хотод дүрвэгсдийн зүгээс үйлдэж байгаа хууль зөрчсөн, иргэдийн амгалан тайван байдал алдагдуулсан гэмт үйлдлийн талаарх гомдол нэмэгдсээр өдгөө 516 өргөдөл хууль сахиулагчдад ирээд байна.
Германы цагдаагийн газрын мэдээлж байгаагаар ирж байгаа гомдлын 40 орчим хувь нь бэлгийн шинжтэй гэмт хэрэг, үйлдэл гэнэ.
Шинэ жилийн шөнө гэхэд л өөрсдөд нь ямар нэг байдлаар халдлаа гэсэн гомдол 133 иржээ. Кельнд араб гаралтай залуус гудамжаар зорчиж явсан бүсгүйг өдөөн хоргоож дээрэмдэн, хүчирхийлэхээр оролджээ. Ийм шинжтэй гэмт хэрэг Берлин, Билефельд, Майн дахь Франкфурт, Штутгарттад бас бүртгэгдээд байгаа юм байна.
Бямба гарагт Кельн хотод дүрвэгсдийн эсрэг болон тэднийг хамгаалах цуглаан болж хоёр тал бие биен рүүгээ чулуу, лонх, модоор шидэлцсэн тул цагдаагийнхан аргагүйн эрхэнд усаар шүршихэд хүрчээ. Эмх замбараагүй байдлын үеэр цагдаагийн ажилтан болон сэтгүүлч өртөж гэмтсэн гэнэ.
Финляндад бас дүрвэгсдийн зүгээс үйлдэх бэлгийн чанартай гэмт хэрэг ихэслээ гэж байна. Эндхийн хэвлэлүүдийн мэдээлж байгаагаар бол эмэгтэйчүүдийг хүчирхийлэх гэмт хэрэг олон нийтийн газарт ч гарах болж амар тайван финчүүдийг гайхшруулж байгаа гэнэ.
Нийслэл Хельсинкийн Цагдаагийн газрын орлогч Илккли Космкемяки британийн The Telegraph сонинд энэ бол Финляндад  цоо шинэ үзэгдэл гээд эрчүүд эмэгтэйчүүдийг хэд гурваараа хөөж, үнсч үнгэлэн үүнээс ч аймшигтай үйлдэл гаргаж хүч хэрэглэдэг боллоо гэсэн байна.
Данид ийм явдал гарч. Африкаас Европт анх удаагаа ирсэн 33 настай Абду Осман Келиф лалын шашинт эмэгтэйчүүдийг бодвол харьцангуй ил задгай хувцасладаг европ эмэгтэйчүүдийг хараад зүгээр л шокод орж гудамжинд шууд барьж аваад үнсч, архиар дайлсан гэнэ. Дүрвэгч үүнийгээ ингэж хувцасласан эмэгтэй биеэ үнэлэгчтэй адил харагдсан гэж тайлбарлаад өөрөө дүрвэгсдэд зориулсан сургалтад хамрагдахыг зөвшөөрсөн байна.
Ийн Европт ирж байгаа дүрвэгсдийн тоо нэмэгдэхийн хэрээр бэлгийн шинжтэй гэмт хэргийг тоо өсч, эрх баригчид нь амьдрал хайн ирж байгаа дүрвэгсдэд бэлгийн хүмүүжил олгох хөтөлбөр хэрэгжүүлэх шаардлагатай болж байна.
Норвегид гэхэд л Засгийн газар нь дүрвэгсэд нэмэгдсээр байгаатай холбогдуулан ийм хөтөлбөр гаргасан байна. Данийн Ардын нам социал либерал болон социал демократуудын дэмжлэгтэйгээр дүрвэгсдэд дани хэл олгох сургалтын хүрээнд бэлгийн хүмүүжил олгох хичээлүүд оруулж байхаар шийдвэрлэсэн байна.
Европын орнууд, хууль сахиулагчид энэ бүхнийг дүрвэгсдийн өөрсдийн нь эх орон, лалын шашинт улсуудад эмэгтэйчүүдтэй харьцах харьцаа, хандлага огт өөр, эмэгтэйчүүд нь ч өөр ёс заншилтай, хувцас хэрэглэл нь ч өөр байдгаас болоод ийм чөлөөтэй нийгэмд орж ирсэн нь тэднийг тулгамдахад хүргэж байна гэж үзэж байна.
Ийм ч учраас нийгмийн хэв журам сахиулахын тулд дүрвэгсдийг  барууны соёлд сургаж нэг ёсондоо нийгэмшүүлэх, европын хууль эрхзүй, бэлгийн хэм хэмжээнд хүргэхэд тодорхой бүтэц, зохион байгуулалттай ажил хэрэгтэй гэж үзэх улстөрчдийн тоо өсч байна.
Юуны түрүү улс оронд нь амьдрахаар ирж байгаа дүрвэгсдийн дагаж мөрдөх ёстой энгийн дүрэм, журам гаргаж. Норвегийн Ставангер болон бусад хотуудад үүнтэй уялдсан сургалтын хөтөлбөрүүд хичээллэж эхэлсэн байна.
Сандес хотын Дүрвэгсдийг хүлээнм авч бүртгэх төвийн тэргүүн Нина Мачиба хамгийн наад зах нь л зөв болоод буруугийн ялгааг мэддэг болгох явдал  түр хугацааны энэ сургалтын гол зорилго байгаа юм гэж New York Times сонины сурвалжлагчид ярьжээ. Энэ сургалтаар үнэхээр энгийн зүйл, дагаж мөрдөх наад захын дүрэм журмыг л танилцуулдаг гэнэ. Ухаандаа Норвегид өөр хэн нэгэнтэй бэлгийн харьцаанд орох, ялангуяа хууль ёсны гэр бүлтэй хүнтэй ингэж болохгүй гэдгээс эхэлдэг байна. Ингээд цаашлаад ямар тохиолдолд гэмт хэрэг болох, хуулийн ямар хариуцлага хүлээх гээд үргэлжилнэ.
2009-2011 онд Норвегийн Ставангер хотод дүрвэгсэд хэд хэдэн удаа хүчингийн хэрэг үйлдэж нефть олборлолтын энэ хотод дуулиан болж байсан удаатай. Яг тэр үеэр тус хотын цагдаагийн газрын дарга асан Генри Ове Берг энэ тухайд эмэгтэй хүн гэдэг угаасаа л гивлүүр зүүж нүүрээ халхалсан байх ёстой гэж үздэг шашин сурталтай орны иргэд анх удаагаа л богино банзал, задгай энгэртэй хувцас өмсөнийг хараад нэг талаар ойлгомжгүй ч юм шиг, нөгөө талаар тэсвэр тэвчээр нь алдуурсантай холбоотой гэжээ.
Берг ийм байдал нь бэлгийн шинжтэй гэмт хэргийн үүдэл болдог гэдгийг өөрийн туршлагаасаа мэдэх учраас дүрвэгсдэд зориулсан “бэлгийн хүмүүжил” хөтөлбөрийг дэмжиж байгаа нэгэн.
Норвегийн төрийн мэдээллийн NRK  компанийн мэдээлснээр сүүлийн үед энд гарсан бэлгийн шинжтэй 20 гэмт хэргийн 17-г нь л гэхэд дүрвэгсэд үйлдсэн байхад гурав нь л норвегийн үндсэн иргэн байжээ.
 “Улс оронд нь иргэний дайн, самуун болоод амар амгалан амьдрах газар эрж яваа юм зайлуул” хэмээн Европын холбоо, улс орнууд найр тавин угтаж байгаа ч  Ойрхи Дорнод, Сири Ливиэс дүрвэн ирж байгаа цагаачид Европт ийм шинэ аюул нүүрлүүлж эхэллээ.
Энэ бол асуудлын зөвхөн нэг тал нь. Өнөөдөртөө дүрвэгсдийн үйлдэж байгаа хулгай, дээрэм, бэлгийн шинжтэй гэмт үйлдлийн тухай ярьж байна. Үүний цаана энэ дүрвэгсэдтэй хамт терроризм өвөрлөсөн алан хядагчид ирж байгаа юм биш биз гэсэн хардлага ард иргэдийн төдийгүй улстөрчдийн дунд байсаар байна.
Үүний өмнө хүүхэд тэврээд уйлан хайлан ирж байгаа дүрвэгч эх орондоо ямар алан хядагч байсныг харьцуулан харуулсан зураг интернетийн сүлжээгээр тарж байсныг албаны эх сурвалж нотолж баталж, бариагүй ч бас л нэг юм хэлээд байна. Үүнтэй зэрэгцээд “Лалын улс”, “Алькайда” зэвсэгт бүлэглэлийнхэн Европын улс орнууд, хотуудыг нэр заан алан хядлага үйлдэнэ гэдгээ ил тод зарлаж, интернетээр сүрдүүлж байгаа нь ч бий.
Европын орнуудын үндсэн оршин суугчид энэ бүхэнд  нэг их таатай биш хандаж байгаагаас л Германд хоёр тал болон өөр зуураа мөргөлдөж байгаа нь тэр.
Нөгөө талд нь эдийн засгийн том асуудал байна. Европын ядуу орны нэг Болгар гэхэд л өнгөрсөн онд 10 мянган дүрвэгч хүлээн авсан гэж байгаа. Европын холбоо хэдийгээр мөнгө хуваарилан өгч байгаа ч дүрвэгсдэд байр оромж барих, тэднийг хүлээн авч бүртгэх, байрлуулах, харуул хамгаалалт гээд гарах зардал урссаар л.....
Албан ёсны мэдээгээр өнгөрсөн онд Европын холбооны улсуудад 900 мянга орчим дүрвэгч иржээ. Энэ тоо цаашдаа 1,5 саяд хүрнэ гэж германчууд үзэж байна.
Гэтэл ХБНГУ-ын Эдийн засгийн хамтын ажиллагаа, хөгжлийн сайд Герд Мюллер “Bild am Sonntag” хэвлэлд өгсөн ярилцлагадаа амьдрах газар хайж Сири, Иракаас гарах нийт дүрвэгсдийн дөнгөж 10 хувь нь л Европын  холбооны улсуудад ирээд байгаа, одоо замд 8-10 сая хүн явж байна гэж хэлжээ.