Наймдугаар сарын 9-ний өглөө ОХУ-ын Буриадын Горячинск тосгонд ганцаар явж байсан бүсгүйг машиндаа хүчээр суулган яваад тосгоны захад аваачин хүчиндсэн эрэгтэйг оросын цагдаагийнхан хайж байна. Тэр эрэгтэйг монгол хүн байж магадгүй хэмээн сэжиглэж байгаа юм байна. Хүчиндүүлсэн бүсгүй шокод орсноос хэрэгтнийг ч , машины дугаарыг ч тогтоож чадаагүй гэнэ. Ганцхан хэрэгтэн оросоор муу ярьж байсан, машинд байсан бусадтайгаа гадаадаар, магадгүй монголоор ярьж байсныг нь л мэдүүлжээ.
Горячинскт аав ээж дээрээ ирээд байсан бүсгүй 8-наас 9-нд шилжих шөнө найзуудтайгаа нийлж Байгаль нуурын эрэгт кафед наргиад өглөө нь гэрээдээ ганцаар явсан юм байна. Тосгоны төвд явж байхад нь мөнгөлөг өнгийн “Toyota Harrier” машин дэргэд нь зогсч жолооч нь муухан орос хэлээр хамт зугаалъя гэхэд бүсгүй татгалзжээ. Ингэхээр нь тэр залуу, бүсгүйг машиндаа хүчээр суулгасан байна. Энэ үеэр дэргэдүүр нь өнгөрч явсан 35-40 насны эрэгтэй бүсгүйн хашгирахыг сонсоод гүйн ирж машины хаалгыг нээхээр оролдсон ч хэрэгтэн түүнийг цохиж унагаагаад машиндаа суун тосгоноос гарч оджээ. Машинд нь хоёр эрэгтэй байж тэд хоорондоо гадаадаар, магадгүй монголоор ярьж байсан гэнэ.

Тосгоны захад очоод  бүсгүйг машинаас гарган хүчирхийлсэн гэнэ. Бүсгүй хашгирахад зэргэлдээх байшингаас хүмүүс гарч ирэхэд хэрэгтэн зугтааж амжсан байна.
Одоо цагдаагийнхан гэмт хэрэг үйлдсэн сэжигтнийг хайхын зэрэгцээ бүсгүйд туслахаар очоод зодуулсан эрэгтэйг ч мөн эрэн сурвалжилж байна хэмээн http://www.baikal-daily.ru мэдээлжээ.