Монголчуудын хувьд архи согтууруулах ундааны зохистой хэрэглээ гэдэг үг бараг ашиглагдахаа больсон гэхэд хилсдэхгүй. Учир нь, ДЭМБ жилд нэг хүнд ногдох архи, согтууруулах ундаа наймаас есөн литрт хүрсэн бол тухайн үндэстэн аюултай байдалд орж хэмээн үздэг байна. Гэтэл манай улсад жилд нэг хүнд ногдох архи, согтууруулах ундаа 23 литрт хүрч, хэрэглээ буурахгүй, донтогсод нэмэгдэж байгаа гэсэн эмгэнэлтэй мэдээ бий. Иймээс нийслэлийн удирдлагуудын зүгээс архи согтууруулах ундааг хорих тусам архинд донтогсод нэмэгдэж, түүний хэрээр гэмт хэрэг гарах үндэс болж байгаа гэж үзсэн байна. Нийслэлийн удирдлагын зөвлөлийн ээлжит хурал өчигдөр болж нийслэлд архи согтууруулах ундаа худалдан борлуулах цагийн хуваарьт өөрчлөлт оруулах талаар хэлэлцэв.
Үүнд, Хүнсний худалдааны төвүүд өглөө 08:00-24:00 цаг хүртэл архи согтууруулах ундааг худалдахыг зөвшөөрөх бөөний худалдааны төвүүд 09:00-22:00 цаг хүртэл /үүнд захыг оруулахгүй/, зочид буудалд амралт жуулчны баазын дэргэдэх баар, ресторанууд 10:00-24:00 цаг хүртэл, баар /энгийн/ 15:00-02:00 цаг хүртэл архи согтууруулах ундаа худалдахыг зөвшөөрч харин нэмэлт үйлчилгээтэй буюу тусгай хөтөлбөртэй бааруудыг 15:00-06:00 цаг хүртэл ажиллуулж болох талаар Улаанбаатар хотын ерөнхий менежер бөгөөд Захирагчийн ажлын албаны дарга Б.Бадрал танилцуулсан юм. Нэмэлт үйлчилгээ гэдэгт амьд хөгжмийн тоглолт болон бусад урлагийн хөтөлбөрүүд багтах гэнэ.
Харин нийслэлийн удирдлагын зөвлөлийн гишүүдийн хувьд архи согтууруулах ундаа худалдан борлуулах цагийн талаар өөр өөрийн байр суурийг илэрхийлж байсан юм. Тухайлбал, Нийслэлийн Засаг даргын нийгмийн асуудал хариуцсан орлогч Ц.Энхцэнгэл “Архидан согтуурахтай тэмцэх тухай хуульд нэмэлт өөрчлөлт орсон. Хуульд аймаг нийслэлийн ИТХ-ын саналыг оруулна гэж заасан байдаг. Энэ хүрээнд иргэдийн саналыг оруулах хэрэгтэй.
Мөн согтууруулах ундаа борлуулж эхлэх цагийг гаргаж өгсөн байна. Энэ цагийг нь чөлөөлж өгөх хэрэгтэй” гэсэн юм. Мөн баар цэнгээний газрууд нийслэлийн булан тохой бүрт байгуулагдаж байгаа. Иймээс НИТХ-аас дүүрэгт нь квот олгох нь зүйтэй гэсэн санал ч хэлж байсан юм.
Өнөөдрийн байдлаар 24:00 цагаас хойш архи согтууруулах ундаа худалдан борлуулахыг хориглоно гэж байгаа ч энэ хууль хэрэгждэггүй гэдгийг захын хүн хэлнэ. Иймд архи худалдаалах цагийг нь чөлөөлөөд өгөх хэрэгтэй гэсэн саналыг Нийслэлийн Засаг дарга бөгөөд Улаанбаатар хотын захирагч Э.Бат-Үүл хэлсэн. Тэрээр “Баар, ресторануудын архи согтруулах ундаа худалдан борлуулах цагийг сунгахыг би хувьдаа дэмжиж байна. Гэтэл бусад гишүүд социализмын үеийнх шиг юм яриад байх юм. Архи согтууруулах ундааг 12:00 цагаас хойш зарахыг хориглосноос хойш архидалт нэмэгдсэн. Учир нь, баар, цэнгээний газрууд сүүлийн захиалга гэж авдаг болсон. Үүний хэрээр ч залуус өндөр градустай архи сонгох болсон. Харин эсрэгээр нь цагийг нь чөлөөлөөд өгвөл тааваараа сууна байх. Бусад улс оронд тухайлбал, Вена хотын туршлага байна. Энэ бол архидан согтуурахыг дэмжиж байгаа хэрэг биш. Тэгээд ч зуны улирал болж манайхыг зорих жуулчид нэмэгдсэн байна. Харин 24:00 цагаас хойш ажиллавал тэдэн төгрөг, өглөөний 06:00 цаг хүртэл ажиллавал тэдэн төгрөг төлнө гэсэн төлбөрийн систем гаргах хэрэгтэй” хэмээв.
Ингээд удирдлагын зөвлөлийн ээлжит хуралдаанаар архи согтууруулах ундаа худалдан борлуулах цагийг сунгах журам гаргаж тухайн журамд үнэ тарифын талаар тусгахаар болсон. Нийслэлийн Засаг даргын захирамжийг Үндэсний их баяр наадмаас өмнө гаргана гэлээ.
