Казахстан улсын нийслэл Алматы хотноо Азийн залуучуудын аварга шалгаруулах тэмцээн боллоо. Тус тэмцээн нь эрэгтэй чөлөөт бөхийн 15, эмэгтэй чөлөөт бөхийн 10 дахь тэмцээн бөгөөд Арабын нэгдсэн Эмират улс, БНСУ, Вьетнам, Иордан, Ирак, Иран, Казахстан, Киргиз, Монгол, Тажикстан, Тайвань, Тайланд, Туркмен, Узбек, Энэтхэг, Япон зэрэг 17 орны баг тамирчид оролцож байгаа юм.
Тус тэмцээнийг ФИЛА-гийн товчооны гишүүн, Азийн хорооны ерөнхийлөгч Ким Чанг Кью, ФИЛА-ийн товчооны гишүүн, Казахстаны бөхийн холбооны хүндэт ерөнхийлөгч, Даулет Турлыханов нар үзэн сонирхжээ. Уг тэмцээний эмэгтэйчүүдийн 44, 51, 59, 67 кг-ын жингийн барилдаан болж 51 кг-д улсаа төлөөлөн оролцсон Э.Даваачимэг мөнгө, 67 кг-ын жинд зодоглосон О.Оюунтуяа хүрэл медаль хүртсэн байна. Э.Даваачимэгийн хувьд эхний тойрогт Вьетнамын бөх Нгуен Ти Хангийг цэвэр ялж хэсгээсээ гарах барилдаанд Өмнөд Солонгосын бөх Шин Хуе Леег 3:1, 1:0 онооны харьцаагаар хожиж алтан медалийн төлөөх барилдаанд Японы бөх Мияхара Юутай таарч 0:1, 0:6 оноогоор ялагджээ. Харин О.Оюунтуяагийн хувьд Өмнөд Солонгос улсын бөх Хуен Жин Шинтэй таарч түүнийг 4:1, онооны харьцаагаар ялж хэсгээсээ гарах барилдаанд Хятадын бөх Ли Жинг Нингт 1:5, 0:4 онооны харьцаагаар дийлдэж хүрэл медалийн төлөө тэмцээнийг зохион байгуулагч эзэн орны бөх Гулмарал Еркебаеваг 4:4, 6:2 онооны харьцаагаар ялсан байна. Өчигдөр эрэгтэйчүүдийн 48, 55, 63, 72 кг, эрэгтэйчүүдийн 50, 120 кг-ын жингийн барилдаан болж тус тэмцээний хаалтын ажиллагаа болох юм. Дашрамд сонирхуулахад Казахстан улсын удирдлагууд энэхүү тэмцээнд түрүүлсэн тамирчиддаа олон улсын хэмжээний мастер бол олгохоо амласан байна.
