Барууны орнуудын хамгийн зартай дайсан нь болж эрэн сурвалжлагдаж буй Исламын улс бүлэглэлийн гишүүн Жихад Жон бол Кувейтээс Британид цагаачлан ирсэн Жассем Эмвазигийн хүү Мухаммед Эмвази хэмээн Английн хэвлэлүүд шуугьж буй. Гэвч хэвлэлийнхний тодруулсан Жихад Жон үнэхээр Мухаммед Эмвази мөн эсэхийг хэн батлах юм хэмээн эцэг нь хүүгээ өмөөрөн Кувейтийн хэвлэлд ярилцлага өгчээ. Британийн бүх хэвлэлд Мухаммед Эмвазиг Жихад Жон хэмээн мэдээлж, түүний өнгөрсөн улирсан бүх амьдралыг судлан бичсээр байгаа нь түүний гэр бүлийнхэнд хүндээр тусч байгаа бололтой. Хүүг нь Жихад Жон гэж хэлсэн хүн бүрийн эсрэг шүүхэд гомдол гаргаж, заргалдана хэмээн өмгөөлөгчөөрөө дамжуулан мэдээлсэн байна. 
Хэвлэлүүдэд гарч буй мэдээллээр бол 1988 онд Кувейтэд төрж, зургаан настайдаа Их Британид гэр бүлээрээ цагаачлан ирсэн Мухаммед Эмвази нь Исламын улс бүлэглэлийн цаазаар авах харгис ялыг гүйцэтгэдэг тэдний нүүр царай болсон Жихад Жон гэгч алуурчин мөн гэж буй. АНУ-ын албаны хоёр ч эх сурвалж Жихад Жон бол Мухаммед Эмвази мөн гэж баталсан. Барууны барьцааны иргэдийг цаазаар авч буй түүний бичлэгийг үзээд, ээж нь дуу хоолойг нь таньсан гэж Английн сонинд мэдээлж байсан ч энэ бүхэн худлаа гэж аав нь сүүлд ярилцлага өгөхдөө хэлсэн байна.
Багадаа зожиг дуугүй, сургуулийнхандаа дээрэлхүүлдэг байсан нь Мухаммед Эмвазиг хожмоо харгис хэрцгий хүн болгоход хүргэсэн байх гэж нийгэм даяар шуугьж, түүнийг бушуухан барьж ял шийтгэлийг нь хүлээлгэх хэрэгтэй гэж байгаа энэ үед түүнийг өмгөөлөх ганц хүн л үлдсэн нь эцэг нь ажээ. Тэрээр хэвлэлүүдийн мэдээлэлд огтоос итгэхгүй байгаагаа хэлээд хэрэв хүүг нь Жихад Жон гэж хэлэх хүн дахиад гарч ирвэл бүгдийг нь хуулийн байгууллагад өгнө гэжээ.
