Исламын улс бүлэглэлийнхэнд барьцаалагдаад байсан АНУ-ын сүүлчийн иргэн Кайла Мюллер ( kayla-mueller ) амиа алджээ. Исламын улсын зүгээс Кайла Мюллерийг Йорданы агаарын довтолгооны үеэр нас барсан гэж мэдэгдсэн ч террорист бүлгийнхэн өөрсдөө түүнийг хөнөөсөн гэж АНУ үзэж байна. Йорданы нисгэгчийг зэрлэгээр хөнөөсний дараа тус улс Исламын улсын эзэлсэн байршлууд руу агаарын довтолгоо хийсэн юм.
2013 онд Сирид тусламж хүргэхээр явж байхдаа террористуудын гарт орсон 26 настай Кайла Мюллер хэрхэн яаж амиа алдсан нь одоогоор тодорхойгүй байгааг Пентагон мэдэгдлээ. Өнгөрсөн амралтын өдөр Кайла Мюллерийн гэр бүлийнхэнтэй Исламын улс бүлэглэлээс холбогдож, охин нь нас барсан гэдгийг дуулгажээ.
АНУ-ын Ерөнхийлөгч Б.Обама улсынх нь иргэн харь улсад, тэр тусмаа террорист бүлэглэлийн гарт амиа алдсан явдалд гүнээ эмгэнэж байгаагаа илэрхийлээд, “Кайла Мюллер бол Америкийн хамгийн сайн сайхан бүхний илэрхийлэл” хэмээн үнэлсэн байна.
Тэрээр мөн Кайлагийн амь насны төлөө террористуудыг заавал хариуцлага хүлээлгэх болно, үүнд хэр их хугацаа шаардагдах нь хамаагүй, АНУ тэднийг шударга шүүхийн өмнө авчрах болно гэж мөн хэлсэн юм.
Исламын улс бүлэглэлийнхэн АНУ-ын дөрвөн иргэний амь насанд хүрээд байна.
