ОХУ, Монголын хооронд Харилцан визгүй болоод буриадын үйлдвэрүүд монголчуудад зориулан үйлдвэрлэлийнхээ хэмжээг өсгөж эхэлжээ.
ОХУ-ын Буриад улсын хэмжээгээр нийт үйлдвэрлэл нь 2014 онд өмнөх онтойгоо харьцуулахад 41,6 хувь өсч 8,5 тэрбум рубльд хүрсэн гэнэ. Хүнсний бүтээгдхүүний үйлдвэрлэл гэхэд л жилийн дүнгээр 122,8 хувь болсон нь нийт оросын үйлдвэрлэлийн өсөлтөөс ч илүү гарсан  дүнтэй байна. Газар тариалангийн үйлдвэрлэл бол бүхэлдээ өссөн бол мах, махан бүтээгдхүүний үйлдвэрлэл ч өмнөх 2013 оныхоос 3,3 дахин, боловсруулсан сүүн бүтээгдхүүн 51 хувь, цөцгийн тос 55,1, хагас боловсруулсан мах 5,6, цэвэр усны үйлдвэрлэл 21,2 хувь өсчээ.
Ийн үйлдвэрлэл өсөхийн хэрээр ажлын байр нэмэгдэж үйлдвэрлэлийн салбарт өндөр мэргэжлийн 211 ажлын байр бий болсон гэнэ.
Хүнсний үйлдвэрлэлийн салбарт бүтэгдхүүн үйлдвэрлэл ингэж өсч байгаа нь бүтээгдхүүнээ хөрш Крым болон Монгол улс руу гаргах хэмжээ өсч байгаатай холбоотой хэмээн baikalfinans.com сайтад бичжээ.
Бидний сайхан сэтгэлт монголчууд өмнөд хөрш БНХАУ-ын Шилийн гол аймгийн хилийн боомт Эрээн хотыг жинхэнэ ёсоор нь хөгжүүлсэн. Монгол Улсын нийслэл Улаанбаатар дөрвөн уулынхаа дунд гэр хороолол, утаан дундаа холилдон социализмын үеийнхээсээ ч улам дордон чихэлдэж, царай алдаж байхад бид байдаг бүхий л мөнгөөрөө Эрээн хотдоо хөрөнгө оруулан хөгжүүлж орчин үеийн сайхан хот болгосон.  
Одоо ОХУ-д визгүй зорчдог болсноор умард хөрш, орос, Буриад руугаа хөрөнгө оруулан Улан-Үд, Эрхүү хотыг хөгжүүлэхээр нэгэнт сэтгэл шулуудсан нь энэ. Оросууд ч инэгээд ёстой л нөгөө "Тунгалаг тамир" роман дээр Итгэлт баяны хэлдгээр цөлхөөвийг ёстой өвөр түрий рүүгээ юүлэх гээд инээгээд сууж байна. Үүний ч үнэрийг аваад тэдний бүхий л үйлдвэрүүд нь үйлдвэрлэлийнхээ хэмжээг өсгөх гэж байдаг хэрээрээ чармайж байна. Ядаж байхад монголчуудын авдаггүй юм гэж байх биш......Ёстой нүдэнд харагдсанаа л авдаг юм чинь.
ОХУ-д визгүй болсон ганцхан сарын дотор Орос-Монголын хилээр дамжин өнгөрсөн монгол хүний тоо 2-3 дахин нэмэгдсэн нь үүний гэрчилнэ. Чухамдаа оросууд манай монголыг тоож наашаа гарч ирнэ гэвэл ёстой худлаа.  ёстой харагдаач гэдэг л энэ.
Гэтэл манай төрийнхөн улсаа хөгжүүлж, ард түмнээ өөрсдөө тэжээхийн оронд ОХУ-д очоод "Хоёр улс вигүй болчихоод байхад Оросын хил, гаалийнхан хүнд суртал гарган манай иргэдийг хил гаргахгүй чирэгдүүлж байна" гэсэн юм яриад л тэнэгтэж байдаг. Гадаад хэргийн сайд Пүрэвсүрэн саяхан Сэлэнгэ аймагт ажиллахдаа ингэж хэлснийг ОХУ-ын Буриад улсын хэвлэлүүд мэдээлсэн билээ.
Тэд бол үйлдвэрлэгч орон, манай монголоос тэдэнд авах байтугай шиншлэх юм ч байхгүй. Мах авна гэж хэдэн жил манай  төрийн гэнэн томцуулыг цонхны шил долоолгов. Үнэн хэрэгтээ дээд хэмжээний уулзалт дээрэ л томцуул нь наашаа харж инээж байгаад хэлдэг болохоос биш цаашаа хараад мэргэжлийн хяналт, эрүүл ахуйн албаныхандаа “битгий ав” гээд л хэлчихдэг. Ийм байдал 25 жил үргэлжилж байгаа.
Ингээд л өөртөө зүү ч үйлдвэрлэж чдахгүй монголчуудыг доогтой харан хилээ нээгээд дэлгүүрийн “мелочи” зөөхийг нь хараад инээгээд сууж байгаа.
Манай эрхэм дээдсүүд “Монгол Улсаа хөгжүүлье” хэмээн элгэн дээрээ гараа тавин инээж зогсоход хэдэн төгрөг нь ийн Орос, Хятад руу гаран том том хот болон өргөжиж байгаа нь энэ.
Монголчууд бид хуруу хумсаа хуйхлан байж олсон хэдэн  төгрөгөө юань болгон хятадад хөрөнгө оруулж Эрээн хотыг хөгжүүлчихээд одоо рубль болгон ОХУ-д хөрөнгө оруулж Хиагт, Улан-Үдэ хотыг хөгжүүлж эхэлж байгаа нь энэ.