Армяны Гюмри хотод нэгэн гэр бүлийн зургаан хүний зэрлэгээр хороосон орос цэрэг Валерий Пермяковыг цагдан хорьж байгаа оросын цэргийн баазад Армяны парламентын гишүүн Мартун Григорян хүрэлцэн очсон байна. Тэрээр “Бид Оросын цэргийн баазад очиж алуурчныг өөрийнхөө нүдээр харлаа. Тэр тэнд байсан. Бид гэмт хэрэгтнийг армяны талд шилжүүлэн өгөхийг цэргийн баазынхнаас  шаардсан” гэж цугларсан олны өмнө хэлжээ. Тэр бас “Бид ердөө л хэрэгтнийг армяны шударга шүүхэд шилжүүлэн өгөхийг шаардаж байгаа. Харин ч манай ард түмэн тайван байж эмх замбараагүй явдал, мөргөлдөөн гаргахгүй өдөөн хатгалгад өртөхгүй  байгаад талархаж байна. Ард түмнийхээ хүсч байгаагаар асуудлыг шийдвэрлэж үүссэн нөхцөл байдлаас гарахыг Засгийн газар оролдож байна” гэж мэдэгдсэн байна.

Пүрэв гарагт Гюмри хот дахь ОХУ-ын ерөнхий консулын газрын дэргэд орос цэргийг армяны талд өгөхийг шаардсан олон нийтийн жагсаал болсон байна. Эмх замбараагүй байдал үүсэхэд хүрсэн учраас цагдаагийннхан 13 хүнийг саатуулсан бол 14 хүн бэртэж шархадсан байна. Нийслэл Ереван хотод ч бас Гюмри хотод болж байгаа эсэргүүцлийн хөдөлгөөнийг дэмжсэн олон нийт Эрх чөлөөний талбайд  цуглаж цагдаагийнхантай мөргөлдсөнөөс 20 хүнийг саатуулжээ. Ийм жагсаал бас Ереван дахь ОХУ-ын ЭСЯ-ны дэргэд ч болсон байна.

Оросын цэргийн албан хаагч 18 настай Валерий Пермяков гэгч энэ сарын 12-ны өдөр ангиасаа зэвсэг авч оргоод Гюмри хот дахь Аветисяны гэр бүлийн зургаан хүний амийг хөнөөсөн юм. Томцуулыг автомат буугаар буудан хөнөөсөн бол хоёр настай охиныг орон дээр нь жадлан алсан байжээ. Энэ гэр бүлээс одоо ганцхан зургаан сартай хүү л цээжиндээ бууны шархтай амьд үлдсэн нь эмнэлэгт хүнд байгаа юм.

Оросын тал харин баривчилсан цэргээ цэргийн бааздаа аваачсанаас өөрөөр ямар нэгэн албан ёсны байр сууриа илэрхийлээгүй, гэмт хэрэгтнээ ч байцааж эхлээгүй байгаа юм.

Энэ аймшигт хэргийн дараанаас л армяны Гюмри хотод эсэргүүцлийн хөдөлгөөн өрнөж, хотын төвд, оросын  консулын газар, цэргийн баазын дэргэд жагсаал цуглаан болсоор байгаа юм.