Өвөрмонголын Дүрвэд, Сөнөд аймгаас 50 орчим малчин Бээжингийн зүг эсэргүүцлийн жагсаал хийхээр иржээ. Тэд Зүрэхийн цэргийн сургуулийн бааз малчдын эртнээс малаа хариулж ирсэн бэлчээр нутгийг хууль бусаар эзэлж, малчид орон нутгаасаа нүүхэд хүрээд байгааг эсэргүүцэн ийм хөдөлгөөн зохион байгуулж. Эсэргүүцлийн хөдөлгөөний зохион байгуулагч Давшилтыг орон нутгийн цагдаагийн газраас байцааж, цаашид энэ үйл ажиллагаагаа үргэлжлүүлбэл хатуу шийтгэнэ хэмээн сүрдүүлсэн байна. Эрх баригчид түүний Бээжинд нэвтрэх, олон нийтийн мэдээллийн хэрэгсэлтэй харилцах эрхийг хаасан тухай Өмнөд Монголын хүний эрхийн мэдээллийн төвөөс мэдээлжээ. Жагсаалд оролцогч малчид, тэр дунд монгол хувцсаа өмссөн настай эмэгтэйчүүд монгол, хятадаар бичсэн өргөдөлдөө хариу өгөхийг Бээжин дэх эрх баригчдаас шаарджээ. 
Тэдний шаардлагад малын бэлчээрийг цэргийн болон орон нутгийн засаг захиргааны зориулалтаар ашиглахыг хориглох, Зүрэхийн цэргийн баазад олгосон газрын зөвшөөрлийн мөрөөр шалгах, Монгол малчдыг эртнээс нутаглаж ирсэн газар орноос нь хүчээр нүүлгэн шилжүүлж байгааг зогсоох, хөдөөгийн малчдын үндсэн эрхийг зөрчихгүй байх нөхцөл бололцоог хангах зэрэг зүйл багтжээ. 15 жил шоронд хоригдоод суллагдсан Өвөрмонголын улс төрийн хоригдол Хадаа ч бас Хятадын эрх баригчдад хандан монгол малчдын хууль ёсны эрхийг хамгаалахыг шаардсан мэдэгдэл илгээж. Зүрэх цэргийн сургуулийн бааз нь Дүрвэд, Шилийн гол аймгийн газар нутагт 1066 километр квадрат талбайтайгаар байгуулагдсан байна. Бааз барьснаар тэнд өмнө нь нутаглаж байсан 708 айлын 2900 гаруй хүн орон нутгаасаа хүчээр нүүхэд хүрчээ.
