Дэлхийн хүн амын дундаж наслалт 1990 оны үеийнхтэй харьцуулбал даруй зургаан жилээр уртасч 71,5 жил болжээ. “Lancet” сэтгүүлд бичсэнээр бол хорт хавдар, зүрх судасны өвчин, цусан суулгалт зэрэг өвчний улмаас нас барагсдын тоо өндөр хөгжилтэй орнуудад буурч, иргэдийнх нь дундаж наслалт өссөн нь дэлхий нийтийн үзүүлэлтийг урагшлуулахад нөлөөлжээ. Гэхдээ ДОХ/ХДХВ, элэгний С вирусээс үүдсэн хорт хавдар, амьдралын буруу зуршлаас үүдсэн янз бүрийн өвчлөл нэмэгдэх болсон нь олон сая хүнийг цагаасаа эрт хорвоог орхиход хүргэж байгааг мэргэжилтнүүд дурджээ. Тиймээс иргэд өөрсдөө амьдралын хэв маягт анхаарч, эрүүл хоол хүнс сонгож, идэвхтэй хөдөлгөөнтэй байх юм бол хүн төрөлхтний дундаж наслалт цаашид улам уртсах боломжтойг энэ удаагийн судалгаа харууллаа хэмээн мэргэжилтнүүд мэдэгдэв.
