Эрүүл мэндийн даатгал даатгуулагч нь өртөг өндөртэй мэс засал хийлгэсэн тохиолдолд уг мэс засалд шаардагдах зарим эмнэлгийн хэрэгсэл, протезийн үнийн тодорхой хэсгийг Эрүүл мэндийн даатгалын сан /ЭМД/-гаас төлөхөөр боллоо.
ЭМД-ын үйлчилгээний нэр төрлийг өргөжүүлснээр даатгуулагчдын эрүүл мэндийн улмаас үүсэлтэй санхүүгийн ачааллыг хөнгөлөх юм. Эрүүл мэндийн сайдын 2014 оны 380 дугаар тушаалаар “ЭМДС-гаас санхүүжих өндөр өртөг бүхий мэс заслын тусламж, үйлчилгээнд шаардагдах зарим эмнэлгийн хэрэгсэл, протезийн жагсаалт”-ыг батлан 2015 оны 01 дүгээр сарын 01-нээс мөрдөхөөр шийдвэрлэжээ.
Өндөр өртөгтэй мэс заслын тусламж, үйлчилгээнд дараах мэс заслыг хамруулав.Үүнд: Зүрхний төрөлхийн гажгийн мэс засал, зүрхний олдмол гажгийн, зүрхний ишемит өвчний үеийн, артерийн судасны эмгэгүүдийн үеийн, тархи мэдрэлийн, бүдүүн шулуун гэдэсний, бөөрний, чих, хамар, хоолойн, гэмтэл, бэртлийн, ерөнхий мэс заслын болон эрхтэн, хиймэл эрхтэн суулгах мэс засал багтаж байна.
2015 онд өртөг өндөртэй мэс заслын тусламж, үйлчилгээнд шаардагдах зарим эмнэлгийн хэрэгсэл, ортопедийн үнийн хөнгөлөлтөд Нийгмийн даатгалын сангийн 2015 оны төсвийн тухай хуулиар баталснаар ЭМДС-гаас 13.4 тэрбум төгрөг зарцуулахаар төлөвлөжээ.
Мөн даатгуулагч тухайн сард өвчний учир эмчийн заалтаар оношлогоо, шинжилгээ хийлгэх бол ЭМДС-гаас 55000 төгрөгийн хөнгөлөлт үзүүлж байсныг нэг удаа гурван сарын хэмжээтэй тэнцүү хэмжээгээр буюу 165000 төгрөгийн хөнгөлөлт эдлэх боломжтой болов.
