Ирэх оны хавар Монголд дэлхийн чансаа өндөртэй "Мотокросс гран при" буюу мотоциклын дэлхийн аварга шалгаруулах тэмцээн болох гэж байна.
Олон улсын Мотоциклын холбоо болон Европын Мотоциклын холбооны дэд ерөнхийлөгч Мишел Турк тэргүүтэй төлөөлөгчид УИХ-ын гишүүн, Монголын Автомашин Мотоциклын Спортын холбооны ерөнхийлөгч Г.Батхүүтэй уулзсан юм. Уулзалтын үеэр манай улсад ирэх онд дэлхийн аварга шалгаруулах тэмцээн зохион байгуулах, мөн тамирчдад өндөр хэмжээний туршлага, дасгалжуулагч бэлтгэх боломж бололцооны талаар талууд ярилцлаа.
УИХ-ын гишүүн, Мотоциклын Спортын холбооны ерөнхийлөгч Г.Батхүүгийн хувьд 14 дэх жилдээ уг холбоог тэргүүлэн ажиллаж байгаа. Энэ спортыг сонирхогчид сүүлийн жилүүдэд их нэмэгдэж байгаа юм. Харин манай тамирчдын үзүүлсэн амжилтын хувьд “Мотокросс гран при” тэмцээнд 2009 онд хамгийн өндөр амжилт буюу 24 дүгээр байр эзэлж байжээ. Тэмцээнийг цаг агаарын хувьд тохиромжтой гэж үзэн 6-8 сарын үед зохион байгуулах гэнэ.
