51 дэх удаагийн тус тэмцээнд 100 гаруй орны 2027 буудагч 55 дасгалд цэц мэргэнээ сорьж байгаа бөгөөд 2016 оны Рио де Жанейрогийн зуны олимпийн наадамд оролцох 64 эрх олгох юм. Монгол Улсын шигшээ багийн ахлагчаар Монголын буудлага спортын холбооны хүндэт ерөнхийлөгч В.Отгондэмбэрэл, Үндэсний шигшээ багийн албаны дарга Ч.Эрдэнэтуяа, багийн  дасгалжуулагчаар гавьяат дасгалжуулагч Л.Ундралбат, ОУХМ С.Адилбиш нар ажиллаж байна. Хөдөлмөрийн баатар, гавьяат тамирчин О.Гүндэгмаа тэргүүтэй 12 буудагч насанд хүрэгчдийн 10 дасгалд, СМ Б.Буянбаатар ахлагчтай гар бууны гурван тамирчин залуучуудын дөрвөн дасгалд өрсөлдөнө.

Өчигдөр хийн урт бууны эрэгтэйчүүдийн дасгалд ОУХМ Н.Баяраа, Б.Бишрэл, Х.Бямбабаатар нар буудсан юм. Энэ дасгалд нийт 116 буудагч оролцжээ. Манай тамирчдын хувьд ОУХМ Н.Баяраа 620,7 оноогоор 48-р байрт, Х.Бямбабаатар 619,5 оноогоор 61-р байрт, Б.Бишрэл 614,5 оноогоор 82-р байрт шалгарсан байна.

Хийн урт бууны эрэгтэйчүүдийн дасгалд Хятадын залуу буудагч Ван Хаоран үндсэн буудлагандаа 632,1 оноо авч дэлхийн залуучуудын рекорд тогтоосон бол финалд 207,9 оноо авч дэлхийн аваргад анх удаа түрүүллээ. Энэ жил 18 настай тэрбээр, Ази тив, Дэлхийн цом, Дэлхийн цомын финал, Залуучуудын олимп “Наньжин-2014” наадмын аварга юм. Харин мөнгөн медалийг ОХУ-ын буудагч Европ болон дэлхийн цомын аварга, дэлхийн рекордч, 25 настай Назар Лоугинец, хүрэл медалийг Беларусийн буудагч дэлхийн цомын мөнгөн медальт 40 настай Виталий Бубнович нар тус тус хүртжээ. Багийн дүнгээр нийт 29 багаас Хятадын баг 1886,5 оноогоор дэлхийн дээд амжилт шинэчлэн тэргүүлсэн бол Оросын баг 1880,5 оноогоор, Беларусийн баг 1874,0 оноогоор эхний байруудад шалгарлаа. Манай багийн хувьд 1854,7 оноогоор 21-р байрт шалгарсан байна.

Өнөөдөр манай 10 тамирчин дэлхийн дэвжээнд гарна. Тухайлбал, 25 метрийн спорт гар бууны дасгалд МУГТ О.Гүндэгмаа, ОУХМ Ц.Мөнхзул, Т.Баярцэцэг нар тогтоол 30 сумаа буудна. Тэмцээн Улаанбаатарын цагаар 15.00-19.30 цагт болох юм. Харин энэ дасгалд өрсөлдөх тамирчид маргааш хурдан 30 сумаа буудсанаар нэгдсэн дүн гарч, финалд дахин буудна. Харин 10 метрийн хийн урт бууны эмэгтэйчүүдийн дасгалд ОУХМ О.Янжинлхам, Ч.Нарантуяа,Г.Нандинзаяа нар буудна. /Тэмцээн 18.00-20.35 цагт  үргэлжилнэ. шигшээ буудлага 22 цагт/ Мөн 50 метрийн сонгомол гар бууны эрэгтэйчүүдийн дасгалд ОУХМ Э.Даваахүү буудах бол /Тэмцээн 17.15-18.45 цагт дуусна.  Финал 20 цагаас эхэлнэ/ 50 метрийн сонгомол гар бууны залуучуудын дасгалд СМ Б.Буянбаатар, Ш.Буянзаяа, О.Төгөлдөр нар буудна. /Тэмцээн 15.00-16.30 цагт дуусна. Финал 18 цагаас эхэлнэ/

ДАШТ-ий үеэр Олон улсын буудлагын холбооны тамирчдын зөвлөлийн гишүүдийн сонгууль болно. Манай улсаас Бээжингийн олимпийн мөнгөн медальт О.Гүндэгмааг нэр дэвшүүлжээ. Энэхүү сонгуулийн дүн энэ сарын 19-нд гарах юм.